មកដឹងរឿងរ៉ាវមួយចំនួនរបស់តារាចម្រៀងស្រី ២រូប មុនក្លាយជាម្ចាស់ពានរង្វាន់ក្នុងកម្មវិធីលំដាប់ថ្នាក់ពិភពលោកល្បីៗ

ភ្នំពេញ៖ នាប៉ុន្មានឆ្នាំចុងក្រោយនេះ វិស័យចម្រៀងហាក់ដើរទៅមុខឥតឈប់ឈរពីមួយថ្ងៃទៅមួយថ្ងៃ ដែលធ្វើឱ្យតារាចម្រៀងរះឡើងព្រោងព្រាតដូចផ្កាយនៅលើមេឃអ៊ីចឹងដែរ។

ក្នុងនោះយើងសង្កេតឃើញថា ពន្លកតារាចម្រៀងថ្មីៗដែលកំពុងប្រឡូកក្នុងវិស័យសិល្បៈនាសព្វថ្ងៃនេះ ភាគច្រើនកើតចេញមកពីកម្មវិធីប្រឡងចម្រៀងលំដាប់ថ្នាក់ពិភពលោកល្បីៗរបស់ស្ថានីយទូរទស្សន៍ហង្សមាស និងរស្មីហង្សមាស។

ដោយឡែកនាថ្ងៃនេះយើងនឹងណែនាំប្រិយមិត្តឱ្យបានស្គាល់កាន់តែស៊ីជម្រៅពីតារាចម្រៀងស្រី ០២ដួង ដែលក្លាយជាម្ចាស់ពានរង្វាន់ក្នុងអាជីពជាអ្នកចម្រៀងស្រាប់ទៅហើយ។

១. កញ្ញា ចំរើន សុភ័ក្ត្រ

តារាចម្រៀងដែលមានកេរ្តិ៍ឈ្មោះល្បីល្បាញក្នុងផលិតកម្មរស្មីហង្សមាស កញ្ញា ចំរើន សុភ័ក្ត្រ ធ្លាប់ជាបេក្ខភាពចូលប្រឡងក្នុងកម្មវិធីលំដាប់ថ្នាក់ពិភពលោក The Voice Cambodia រដូវកាលទី១ ប៉ុន្តែកញ្ញាមិនទទួលបានជ័យលាភីនោះទេ។

តែយ៉ាងណាក៏ដោយម្ចាស់បទ “ម៉ែ” រូបនេះក៏បានឈានចូលដល់វគ្គផ្តាច់ព្រ័ត្រស្ថិតក្នុងចំណាត់ថ្នាក់ Top 4 រហូតផលិតកម្មហង្សមាស សម្លឹងឃើញពីទេពកោសល្យទើបផ្តល់ឱកាសឱ្យក្លាយជាតារាចម្រៀងកុងត្រាដូចម្ចាស់ពាន ប៊ុត សីហា ដែរ។

យ៉ាងណាមិញក្រោយរយៈពេលប៉ុន្មានឆ្នាំ កញ្ញា ចំរើន សុភ័ក្ត្រ ក៏សម្រេចចិត្តដាក់ពាក្យប្រឡងចម្រៀងជាថ្មីម្តងទៀតក្នុងកម្មវិធី The Mask Singer Cambodia រហូតទទួលបានជ័យលាភីដូចការស្រមៃពិតប្រាកដមែន។

២. កញ្ញា វី ឌីណែត

ប្រិយមិត្តច្បាស់ជាដឹងរួចមកហើយថា កញ្ញា វី ឌីណែត គឺជាកូនស្រីបង្កើតរបស់តារាចម្រៀងជើងចាស់ ហួរ ឡាវី ហើយកញ្ញាក៏បានក្លាយខ្លួនជាសមាជិកក្នុងផលិតកម្មរស្មីហង្សមាស កាលពីកំឡុងចុងឆ្នាំ២០១៤។

យ៉ាងណាមិញមុនក្លាយជាម្ចាស់ពានរង្វាន់ក្នុងកម្មវិធី I am a Singer Cambodia រដូវកាលទី២ ម្ចាស់បទចម្រៀង “ខ្យល់បក់ចូលភ្នែក” រូបនេះក៏ធ្លាប់បរាជ័យក្នុងកម្មវិធីប្រឡងចម្រៀងជាច្រើនដូចជា I am a Singer Cambodia រដូវកាលទី១ និង The Mask Singer Cambodia ជាដើម៕

សូមទស្សនារូបភាពខាងក្រោមនេះ