បុរសទម្ងន់ជាង៣០០គីឡូក្រាម ចេញពីផ្ទះមិនរួច ដល់ថ្នាក់ត្រូវប្រើរថយន្ដស្ទូច ដើម្បីស្ទូចគាត់ចេញ

បារាំង៖ បុរសម្នាក់មានឈ្មោះថា Alain អាយុ៥៣ឆ្នាំ រស់នៅក្នុងតំបន់ Perpignan និងមានទម្ងន់ដល់ទៅជាង៣០០គីឡូក្រាម ត្រូវបានគេប្រើប្រាស់រថយន្ដស្ទូច ដើម្បីស្ទូចគាត់ចេញពីក្នុងផ្ទះ បន្ទាប់ពីជាប់គាំងទៅណាមិនរួចអស់រយៈពេលជាង១ឆ្នាំមកនេះ។

តាមប្រភពព័ត៌មានបានឲ្យដឹងថា ក្រោយពីរដូវឈ្លឹកឈើជ្រុះក្នុងខែកក្កដា ឆ្នាំ២០១៩ លោក Alian បានរអិលដួល បណ្ដាលឲ្យបាក់ជើង និងមិនអាចដើរទៅណាបានឡើយ ទើបលោកត្រូវសម្រាក និងហូបចុកនៅជាន់ទី១នៃអគារផ្ទះតែម្ដង។ ហើយប្អូនប្រុសរបស់លោក ក៏មានតួនាទីជួយមើលថែលោកចាប់ពីពេលនោះមកផងដែរ។

យ៉ាងណាមិញ កាលពីថ្ងៃអង្គារម្សិលមិញនេះ មានប៉ូលិស អ្នកពន្លត់អគ្គិភ័យ និងគ្រូពេទ្យជាង៥០នាក់ បានចូលរួមជួយសង្គ្រោះលោកឲ្យចេញពីក្នុងផ្ទះ តាមរយៈការប្រើប្រាស់រថយន្ដស្ទូច ដោយសារតែមាឌរបស់លោក មានទំហំធំខ្លាំងពេក មិនសមល្មមនឹងចេញតាមមាត់ទ្វារ។ ហើយដើម្បីស្ទូចលោកចេញមកបាន ខាងក្រុមការងារ ក៏បានរុះរើបង្អួចផ្ទះនៅមាត់ផ្ទូវចេញផងដែរ។ ចំពោះការជួយសង្គ្រោះនេះ ត្រូវបានធ្វើឡើងបន្ទាប់ពីមានការត្រៀមយ៉ាងល្អិតល្អន់អស់រយៈពេលជាច្រើនសប្ដាហ៍ ហើយកំឡុងពេលអន្តរាគមន៍ ក្រុមការងារក៏មានការភ័យខ្លាចថា មានហានិភ័យនៃការដួលរលំជាន់ ឬអគារទាំងមូលទៀតផង។

តែយ៉ាងណាមិញ ទីបំផុត ការជួយសង្គ្រោះក៏បានទទួលជោគជ័យ ហើយលោក Ailan ត្រូវបានគេបញ្ជូនទៅកាន់មន្ទីរពេទ្យ ដោយរថយន្ដសង្គ្រោះបន្ទាន់ដ៏ពិសេសមួយផងដែរ៕

សូមទស្សនារូបភាពខាងក្រោម៖