នេះប្រភេទត្រីតាំងពី៦៥លានឆ្នាំមុន ត្រូវបានគេរកឃើញថា នៅមានជីវិតនៅឡើយ

រ៉ូម៉ានី៖ ទន្លេតូច Valsan ដែលលាតសន្ធឹងនិងហូរយ៉ាងលឿននៅក្នុងប្រទេសរ៉ូម៉ានី មានផ្ទុកជីវិតជាច្រើន ដែលមានទាំងមួយក្នុងចំណោមប្រភេទត្រីដ៏កម្របំផុតនៅអឺរ៉ុប ហើយប្រហែលជានៅលើពិភពលោកផងដែរ។ ប្រភេទត្រី Asprete ដែលមានអាយុ៦៥លានឆ្នាំ ត្រូវបានរកឃើញដំបូង ដោយនិស្សិតជីវវិទ្យានៅឆ្នាំ១៩៥៦ ហើយអស់រយៈពេលជាច្រើនទសវត្សរ៍ វាស្ទើរតែជិតផុតពូជ។

ជីវវិទូអាយុ៥៩ឆ្នាំ លោក Nicolae Craciun បាននិយាយថា បន្ទាប់ពីបានព្យាយាមជួយសង្គ្រោះពួកវាអស់ជាច្រើនឆ្នាំ មនុស្សម្នាបាននិយាយថា ត្រីប្រភេទនេះបានផុតពូជហើយ ប៉ុន្តែគេទើបទទួលបានដំណឹងថា វានៅតែមានវត្តមាន។ ត្រី Asprete គឺជាត្រីរាត្រីចរដ៏តូចមួយ ដែលលាក់ខ្លួននៅក្រោមថ្ម ដែលមានអនាគតមិនប្រាកដប្រជា ហើយប្រឈមនឹងការគំរាមកំហែងជាច្រើន។

ការប៉ាន់ប្រមាណជាផ្លូវការនៃត្រីប្រភេទនេះមានចំនួន ១០-១៥ក្បាល ដែលត្រូវបានគេគិតថា វានៅរស់ក្នុងប្រវែង១គីឡូម៉ែត្រ នៃទឹករាក់ក្រោមថ្មនៃទន្លេ Valsan។ បើប្រៀបធៀបនៅដើមទសវត្សរ៍ឆ្នាំ២០០០ ត្រីប្រភេទនេះមានចំនួនប្រហែល២០០ក្បាល។ ថ្ងៃមួយនៅចុងខែតុលា លោក Andrei Togor អ្នកជំនាញជីវសាស្ត្រត្រី អាយុ៣១ឆ្នាំ កំពុងឃ្លាំមើលប្រភេទត្រីនេះ ហើយបានរកឃើញថា មានចំនួន១២ក្បាល។

ត្រី Asprete ត្រូវបានគេចាត់ទុកថា ជាផូស៊ីលមានជីវិត ដែលមានន័យថា វាបានរស់រានអស់រយៈពេលរាប់លានឆ្នាំ ដែលមិនមានការវិវឌ្ឍទាល់តែសោះ។ ប៉ុន្តែត្រឹមតែ៦ទសវត្សរ៍ចុងក្រោយ បានជះឥទ្ធិពលយ៉ាងខ្លាំងដល់ជម្រកនិងចំនួនសត្វប្រភេទនេះ៕