កោះរាជបុត្រ កំពុងទាក់ទាញភ្ញៀវទេសចរទាំងជាតិ និងអន្តរជាតិ ទៅកម្សាន្តដែនកោះតូចច្រឡឹងមួយនេះ ដែលមានសម្រស់ស្រស់ស្អាត ហើយភ្ញៀវអាចដើរលើស្ពានឈើគយគន់ឆ្នេរ ព្រៃព្រឹក្សា និងសំណឹកថ្ម ក៏ដូចជាថតរូបអនុស្សាវរីយ៍ និងស្រូបខ្យល់បរិសុទ្ធ។
មិនឆ្ងាយទេ ចម្ងាយប្រមាណ ១៤គីឡូម៉ែត្រ ពីឧទ្យានជាតិរាម បន្ទាប់មកយើងនឹងឃើញកូនកោះតូចមួយ បណ្ដែតខ្លួនយ៉ាងសង្ហាលើផ្ទៃសាគរ។ ប្រៀបបីដូចរាជបុត្រមួយអង្គ កោះសំពោធ លយចូលក្នុងផ្ទៃសមុទ្រ ចម្ងាយប្រមាណ ១៤០ម៉ែត្រពីឆ្នេរ។ តភ្ជាប់ពីឆ្នេរមួយនេះ ស្ពានឈើមួយខ្សែបន្លាយខ្លួនអូសកាត់ទឹកសមុទ្រ រង់ចាំចម្លងអ្នកទេសចរ ទៅទស្សនាកូនកោះតូចច្រឡឹង ដែលគ្របដណ្ដប់ទៅដោយរុក្ខជាតិខៀវស្រងាត់។ ជាទីឋានដ៏សែនមនោរម្យ កោះសំពោធមានបរិមាត្រប្រមាណ២៥០ម៉ែត្រ អមដោយស្ពានឈើព័ទ្ធជុំវិញ ដែលផ្ដល់ភាពងាយស្រួលដល់ភ្ញៀវទេសចរក្នុងការទស្សនាទេសភាពលើដែនកោះ។
ដើមឡើយកោះនេះ មានឈ្មោះថា កោះសំពោច ប៉ុន្តែក្រោយពីចិនវិនិយោគលើដែនកោះនេះមក ចិនបានផ្លាស់ប្ដូរឈ្មោះមកជាកោះរាជបុត្រ ប៉ុន្តែ ពលរដ្ឋខ្មែរមួយចំនួនហៅថា កោះចិន ព្រោះចិនវិនិយោគកោះនេះមានរយៈពេលយូរឆ្នាំ។
កោះរាជបុត្រ ស្ថិតនៅក្នុងបរិវេណ ឧទ្យានជាតិរាម ក្នុងភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ។ ភ្ញៀវទេសចរដែលចង់ទៅកម្សាន្តកោះមួយនេះ ត្រូវបង់ក្បាលឡាន ១ដុល្លារ ហើយភ្ញៀវខ្មែរក្នុង ១នាក់ ២ដុល្លារ ឯភ្ញៀវបរទេស ៤ដុល្លារ ប៉ុន្ដែ ប្រសិនបើយើងមិនឆ្លងស្ពានឈើ ដើម្បីទៅកាន់កោះរាជបុត្រ គយគន់ឆ្នេរ និងផ្ដិតរូបភាពកម្សាន្តនោះទេ ពេលត្រឡប់ទៅវិញអាចយកសំបុត្រ ដូរយកលុយវិញបាន៕
សូមទស្សនារូបភាពខាងក្រោម៖