ខណ្ឌ​ដង្កោ គឺ​ជា​ទី​ដែល​រង​ការ​ជន់​លិច​ខ្លាំង​ជាង​គេ ក្នុង​ចំណោម​បណ្ដា​ខណ្ឌ​ផ្សេង​ៗ​ទៀត​ក្នុង​រាជធានី​ភ្នំពេញ​។ ប្រាប់ខ្មែរឡូតនៅរសៀលថ្ងៃ ១៦តុលានេះ លោក ម៉េត មាសភក្តី អ្នកនាំពាក្យសាលារាជធានីភ្នំពេញបានបញ្ជាក់ថា មន្ត្រីសាលាក្រុងបានរៀបចំតង់នៅ ៥ ទីតាំង សម្រាប់ទទួលពលរដ្ឋរងគ្រោះដោយទឹកជំនន់នៅខណ្ឌមួយនេះ។

លោកថា៖ «យើងបានត្រៀមលក្ខណៈរួចរាល់ ដោយបានរៀបចំតង់នៅទីទួលមានសុវត្ថិភាព ៥កន្លែងសម្រាប់​បងប្អូន​ដែលផ្ទះរបស់គាត់លិចទឹកនៅខណ្ឌដង្កោ។ ក្នុងនោះរួមមានតង់ក្នុងបុរីពិភពថ្មីគួរស្រូវ២ តង់មុខផ្សារព្រែកជ្រៃ តង់នៅ​សង្កាត់សាក់សំពៅ សង្កាត់គងណយ និងសង្កាត់រលួស»។

តបនឹងសំណួរដែលថា ទីតាំងខណ្ឌដង្កោកំពុងលិចទឹក ហេតុអីអាជ្ញាធរនៅតែបោះតង់ក្នុងខណ្ឌនោះដដែល? អ្នកនាំពាក្យរូបនេះបកស្រាយថា៖

«ខណ្ឌដង្កោរងគ្រោះមែន តែមិនមែនមានន័យថា គ្រប់កន្លែងសុទ្ធតែលិចទឹកទេ។ អ៊ឹចឹងទោះយើងបោះតង់ក្នុងខណ្ឌ​ដង្កោ ក៏យើងត្រូវរកទីទួលមានសុវត្ថិភាពដែរ មិនមែនទៅបោះនៅជិតកន្លែងលិចទឹកទេ»។

ជាការកត់សម្គាល់ លោក ភក្តី ថា សាលាក្រុងនៅមិនទាន់អាចស្មានដឹងពីតួលេខតង់សរុបដើម្បីបំពេញតម្រូវការ​ជូន​ពលរដ្ឋរងគ្រោះដោយជំនន់នៅឡើយទេ។ តែលោកសង្កត់ធ្ងន់ថា ពលរដ្ឋទាំងអស់ដែលរងគ្រោះដោយទឹកលិចសុទ្ធតែ​ទទួលបានការជម្លៀស។

លោកថា៖ «អាជ្ញាធរនឹងធ្វើប្រតិបត្តិការជិះអូប័រចូលទៅក្នុងទីតាំងប៉ះពាល់ទាំងនោះ ដើម្បីជម្លៀសពលរដ្ឋរង​គ្រោះ​ទាំងអស់​មកកាន់ទីទួលមានសុវត្ថិភាព។ ក្រៅពីនោះ យើងបានត្រៀម កន្លែងស្នាក់នៅ អាហារហូបចុក ថ្នាំសង្កូវ តាំងពីប៉ុន្មានថ្ងៃមុន»។

លោក ម៉េត មាសភក្តី បង្ហាញនូវសុទិដ្ឋិនិយមថា៖ «សូមបងប្អូនទុកចិត្តលើរាជរដ្ឋាភិបាល។ មហន្តរាយទឹកជំនន់ មិនមានអ្នកណាចង់ឲ្យមានទេ។ យើងបារម្ភរឿងអាយុជីវិត គិតគូរខ្លាំងរឿងជម្លៀសមនុស្ស ចំណែកការថែទាំ ការស្នាក់នៅដទៃទៀត គឺយើងរៀបចំរួចហើយ»។

គួរបញ្ជាក់ថា មួយរយៈចុងក្រោយនេះ ស្ថានភាពកម្ពស់ទឹកជំនន់ក្នុងក្រុងចេះតែហក់ឡើងជាបន្តបន្ទាប់ ខណៈ​ស្ថាន​ភាព​​ភ្លៀងចេះតែបន្តធ្លាក់មកស្ទើររាល់ថ្ងៃ។ សម្រាប់ភ្នំពេញ ខណ្ឌ​ដង្កោ គឺ​ជា​ទី​ដែល​រង​ការ​ជន់​លិច​ខ្លាំង​ជាង​គេ ក្នុង​ចំណោម​បណ្ដា​ខណ្ឌ​ផ្សេង​ៗ​ទៀត​​៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ