ថៃរកឃើញអ្នកផ្ទុកជំងឺកូវីដ-១៩ ថ្មី ដែលត្រឡប់មកពីបរទេសចំនួន ២២ នាក់ ក្នុងនោះ ១៧ នាក់ជាទាហាន

ថៃ៖ រដ្ឋាភិបាលថៃបានរាយការណ៍ថា មានករណីឆ្លងកូវីដ១៩ថ្មីចំនួន ២២ នាក់កាលពីថ្ងៃចន្ទ ដោយចំនួនអ្នកឆ្លងសរុបកើនដល់ ៣,៥៤៥ ។ ចំនួនអ្នកស្លាប់មិនមានការផ្លាស់ប្តូរទេគឺ ៥៩ នាក់ដដែល។

ករណីថ្មីចំនួន ១៦ ករណីគឺមកពីប្រទេសស៊ូដង់ខាងត្បូង, ៤ ករណីមកពីប្រទេសឥណ្ឌា, ម្នាក់ពីប្រទេសប៉ាគីស្ថាន និងម្នាក់ទៀតមកពីប្រទេសហ្វីលីពីន។

មជ្ឈមណ្ឌលរដ្ឋបាលសម្រាប់ស្ថានភាពជំងឺកូវីដ (CCSA) បាននិយាយថា ករណីថ្មីទាំង ១៦ ដែលបានមកពីស៊ូដង់ខាងត្បូងគឺជាទាហានថៃដែលត្រឡប់មកពីប្រតិបត្តិការរក្សាសន្តិភាពរបស់អង្គការសហប្រជាជាតិនៅក្នុងប្រទេសអាហ្វ្រិក។

ពួកគេបានវិលត្រឡប់ទៅប្រទេសថៃវិញតាមជើងហោះហើរពិសេសកាលពីថ្ងៃអង្គារ ហើយត្រូវបានគេដាក់នៅដាច់ដោយឡែកក្នុងខេត្តឈុនបូរី។ លទ្ធផលតេស្តរបស់ពួកគេនៅថ្ងៃសៅរ៍គឺមានភាពវិជ្ជមានសម្រាប់ជំងឺ COVID-១៩ ហើយពួកគេត្រូវបានបញ្ជូនទៅមន្ទីរពេទ្យ Phramongkutklao បន្ទាប់ពីការធ្វើតេស្ត។

ទាហានថៃអាយុ ២៤ ឆ្នាំម្នាក់កំពុងសិក្សានៅប្រទេសហ្វីលីពីនបានធ្វើតេស្តវិជ្ជមាននៅថ្ងៃសៅរ៍ផងដែរ។ គាត់បានមកដល់ប្រទេសថៃកាលពីថ្ងៃពុធ ហើយត្រូវបានគេដាក់ឱ្យនៅដាច់ដោយឡែកនៅខេត្តឈុនបូរី។ គាត់បានបង្ហាញរោគសញ្ញា ហើយត្រូវបានបញ្ជូនទៅមន្ទីរពេទ្យ Laem Chabang បន្ទាប់ពីការធ្វើតេស្តនេះ។

និស្សិតប្រុសជនជាតិថៃមកពីប្រទេសប៉ាគីស្ថានអាយុ ១៣ ឆ្នាំម្នាក់ទៀតបានធ្វើតេស្តវិជ្ជមានផងដែរនៅក្នុងការធ្វើតេស្តលើកទី ២ របស់ខ្លួនកាលពីថ្ងៃសៅរ៍ ។ គាត់បានមកដល់ប្រទេសថៃនៅថ្ងៃទី ១៣ ខែកញ្ញាតាមជើងហោះហើរដូចគ្នានឹងអ្នកដំណើរពីរនាក់ផ្សេងទៀតដែលត្រូវបានគេរកឃើញថាមានផ្ទុកមេរោគនេះ។

ករណីថ្មីចំនួន ៤ ផ្សេងទៀតដែលមកពីប្រទេសឥណ្ឌាគឺជនជាតិឥណ្ឌា។ បីនាក់នៃពួកគេបានមកដល់ប្រទេសថៃកាលពីថ្ងៃពុធ ហើយបានធ្វើតេស្តវិជ្ជមាននៅថ្ងៃសៅរ៍ រួមមាន៖ ម្តាយម្នាក់អាយុ ៣៥ ឆ្នាំ, កូនស្រីអាយុ ៧ ឆ្នាំនិង អ្នកជំនួញម្នាក់អាយុ ៣៨ ឆ្នាំ។ និងករណីទី ៤ គឺបុរសអាយុ ៣០ ឆ្នាំម្នាក់ដែលបានមកដល់កាលពីថ្ងៃសុក្រ និងបានពិនិត្យវិជ្ជមាននៅថ្ងៃដដែលនោះ៕

ប្រភព៖ Bangkok Post