ហ្សឺណែវ៖ កាលពីថ្ងៃចន្ទ ទី២៨ ខែកញ្ញា ឆ្នាំ២០២០ អង្គការសុខភាពពិភពលោក (WHO) បាននិយាយថា ឧបករណ៍ធ្វើតេស្ដឆាប់រហ័សនៃជំងឺកូវីដ-១៩ ចំនួន១២០លានឧបករណ៍ នឹងត្រូវផលិតឡើងសម្រាប់ផ្ដល់ជូនប្រទេសដែលមានចំណូលទាប ឬមធ្យម ក្នុងតម្លៃអតិបរមាត្រឹមតែ៥ដុល្លារអាមេរិកប៉ុណ្ណោះ ឬអាចថោកជាងនេះក្នុងមួយឧបករណ៍។ នេះបើយោងតាមទីភ្នាក់ងារសារព័ត៌មាន Reuters ចេញផ្សាយ។

ហើយឧបករណ៍ធ្វើតេស្ដបានរហ័ស អាចជឿទុកចិត្ដ និងមានតម្លៃទាបនេះ នឹងជួយដល់ប្រទេសចំនួន១៣៣ផងដែរ ក្នុងការតាមដាន និងទប់ស្កាត់ការរីករាលដាលនៃជំងឺកូវីដ-១៩។

លោក Tedros Adhanom Ghebreyesus 

ប្រធានអង្គការសុខភាពពិភពលោក លោក Tedros Adhanom Ghebreyesus បាននិយាយថា ក្រុមហ៊ុនផលិត​ Abbott ABT.N និង SD Biosensor បានព្រមព្រៀងជាមួយមូលនិធិ Bill & Melinda Gates របស់លោក Bill Gates ដើម្បីផលិតឧបករណ៍ធ្វើតេស្ដចំនួន១២០លាន ដែលអាចយកតាមខ្លួន និងងាយស្រួលប្រើប្រាស់ ហើយមានសុពលភាពរហូតដល់ជាង៦ខែឯណោះ។ ​​​​​​​​​​​​​​

លោកបន្ដថា ឧបករណ៍ថ្មីនេះ នឹងជួយដល់តំបន់ឆ្ងាយៗ ដែលមិនមានមន្ទីរពិសោធន៍ ឬ បុគ្គលិកពេទ្យទទួលបានការបណ្ដុះបណ្ដាលគ្រប់គ្រាន់ ដើម្បីធ្វើតេស្ដ។

រូបតំណាង

គួរបញ្ជាក់ផងដែរថា ឧបករណ៍ធ្វើតេស្ដថ្មីនេះ គឺសាមញ្ញក្នុងការប្រើប្រាស់ស្រដៀងនឹងឧបករណ៍ធ្វើតេស្តផ្ទៃពោះដែរ ដែលមិនត្រូវការ​មន្ទីរពិសោធន៍ ហើយវានឹងផ្ដល់លទ្ធផលគួរឲ្យទុកចិត្ដក្នុងរយៈពេលតែ ១៥នាទីប៉ុណ្ណោះ៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]