ព្យុះខ្សាច់វាយលុកតំបន់មួយនៅអង់គ្លេស ដែលបណ្ដាលឲ្យផ្ទះ ផ្លូវថ្នល់ និងឡានគ្របដណ្ដប់ទៅដោយខ្សាច់ (មានវីដេអូ)

អង់គ្លេស៖ កាលពីថ្ងៃសៅរ៍ចុងសប្ដាហ៍មុននេះ ពលរដ្ឋនៅភូមិក្បែរឆ្នេរសមុទ្រមួយ ក្នុងតំបន់ Norfolk នៃប្រទេសអង់គ្លេស បានក្រោកពីដំណេក ដោយមានការភ្ញាក់ផ្អើលយ៉ាងខ្លាំង នៅពេលឃើញដំបូលផ្ទះ ផ្លូវថ្នល់ និងឡានគ្របដណ្ដប់ទៅដោយខ្សាច់ពាសពេញតែម្ដង ដែលបណ្ដាលមកពីខ្យល់បក់ខ្លាំង។

យោងតាមសម្ដីរបស់ពលរដ្ឋម្នាក់ឈ្មោះ Durrant បានឲ្យដឹងថា គាត់ស្ទើរតែមិនជឿនឹងភ្នែករបស់ខ្លួនឯង នៅពេលសម្លឹងមើលតាមបង្អួច ហើយគាត់បានគិតក្នុងចិត្តថា អាចនឹងត្រូវចំណាយពេលមួយសប្ដាហ៍ក្នុងការសម្អាតឲ្យវិលទៅរកសភាពដើមវិញ។

ងាកទៅកាន់ អ្នកនាង Caroline វិញ បានបន្ថែមទៀតថា នាងខានឃើញទិដ្ឋភាពបែបនោះ អស់រយៈពេល១៦ឆ្នាំមកហើយ ហើយនាងបានចំណាយពេលមួយព្រឹក ក្នុងការកាយខ្សាច់ចេញពីមុខហាងរបស់នាង ដើម្បីឲ្យអតិថិជនអាចចូលបាន។

យ៉ាងណាមិញ ចក្រភពអង់គ្លេសនឹងរងការវាយប្រហារពីព្យុះ Aiden ដែលមានសន្ទុះប្រមាណ៩៦គីឡូម៉ែត្រក្នុងមួយម៉ោង នាដើមខែតុលាខាងមុខនេះផងដែរ៕

សូមទស្សនារូបភាពនិងវីដេអូខាងក្រោម៖