ភ្នំពេញ៖ គិតមកទល់បច្ចុប្បន្ននេះ រយៈពេល ៧ឆ្នាំមកហើយដែលស្ថានីយទូរទស្សន៍ហង្សមាសបានពាំនាំនូវកម្មវិធីប្រលងចម្រៀងលំដាប់ថ្នាក់ពិភពលោកជាច្រើន ដោយនៅក្នុងនោះ កម្មវិធីខ្លះក៏បានឈានដល់ ២ ទៅ ៣រដូវកាលទៅហើយដែរ។ ដូច្នេះប្រិយមិត្តមួយចំនួនប្រាកដជាចង់ដឹងហើយថា តើម្ចាស់ពានដែលទូរទស្សន៍ហង្សមាសប្រគល់ពានជូន មានចំនួនសរុបប៉ុន្មាននាក់ហើយ? តោះ! មកដឹងទាំងអស់គ្នា៖
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស១. លោក ប៊ុត សីហា៖ គឺជាម្ចាស់ពានបើកឆាករដូវកាលដំបូងគេប្រចាំកម្មវិធី The Voice Cambodia នាឆ្នាំ២០១៤ ប៉ុន្តែក្រោយពីការជួបព្យុះភ្លៀងនឹងរឿងរ៉ាវមួយចំនួនជាមួយនឹងផលិតកម្ម បច្ចុប្បន្នអតីតម្ចាស់ពានរូបនេះ ក្លាយខ្លួនជាតារាចម្រៀងនៅផលិតកម្មថ្មី Morodok Media។
២. លោក នី រតនា៖ គឺជាអតីតម្ចាស់ពានកម្មវិធី “ពេជ្រកំពុងច្នៃ” របស់ស្ថានីយទូរទស្សន៍អាស៊ីអាគ្នេយ៍នាឆ្នាំ២០១៣ ប៉ុន្តែម្ចាស់បទ “មហាឈឺ” រូបនេះ បានទទួលពានរង្វាន់ Cambodian Idol រដូវកាលទី១ បន្ថែមទៀតពីទូរទស្សន៍ហង្សមាស។
៣. ប្អូនប្រុស យឿន ពិសី៖ គឺជាម្ចាស់ពានរង្វាន់ក្នុងកម្មវិធីប្រលងពហុជំនាញ Cambodian Got Talent រដូវកាលទី១ ប្អូនប្រុសជាបេក្ខជនដែលជ្រើសយកវិញ្ញាសាផ្នែកចម្រៀងមកប្រកួត។
៤. លោក ថែល ថៃ៖ គឺជាកូនក្រុមរបស់អ្នកនាង ឱក សុគន្ធកញ្ញា ដែលកាន់ពាន The Voice Cambodia រដូវកាលទី២។
៥. លោក ដួង វីរៈសិទ្ធ៖ គឺជាតារាចម្រៀងអាជីពដែលប្រលងប្រជែងនឹងតារាចម្រៀងអាជីពផ្សេងទៀតរហូតដល់បានក្លាយជាម្ចាស់ពានប្រចាំកម្មវិធី I Am a Singer Cambodia រដូវកាលទី១។
៦. កញ្ញា ឈិន ម៉ានិច្ច៖ គឺជាម្ចាស់ពាន Cambodian Idol រដូវកាលទី២ ដែលកញ្ញាគឺជាម្ចាស់ពានរង្វាន់ស្រីដំបូងគេក្នុងចំណោមកម្មវិធីប្រលងផ្សេងៗរបស់ហង្សមាស ។
៧. កុមារា ពេជ្រ ថៃ៖ គឺជាម្ចាស់ពានដែលប្រលងចម្រៀងក្នុងកម្មវិធី The Voice Kid រដូវកាលទី១ នាឆ្នាំ២០១៧។
៨. លោក គ្រី ថៃពៅ៖ គឺជាម្ចាស់ពាន Cambodian Idol រដូវកាលទី៣ ដែលមានបទចម្រៀងទទួលការគាំទ្រខ្លាំងរហូតដល់ 32M views ក្នុងយូធូបរបស់ហង្សមាសគឺបទ “ស្រលាញ់គេហើយមែនទេ”។
៩. ប្អូនប្រុស ទេព ពិសិដ្ឋ៖ គឺជាម្ចាស់ពានដែលមានស្រុកកំណើតនៅឯខេត្តសៀមរាប ដែលបានចូលរួមប្រលងប្រជែងក្នុងកម្មវិធីចម្រៀងផ្នែកកុមារ The Voice Kid រដូវកាលទី២។
១០. ប្អូនប្រុស ចាន់ សុបញ្ញា៖ គឺជាម្ចាស់ពានវ័យក្មេងអាយុត្រឹម ១៤ឆ្នាំ ដែលបានយកឈ្នះបេក្ខជនជាច្រើនរហូតលើកពាន X Factor រដូវកាលទី១។
១១. ប្អូនប្រុស ភឿន សុភាព៖ គឺជាម្ចាស់ពានក្នុងកម្មវិធី Cambodian Idol Junior រដូវកាលទី១ នាចុងឆ្នាំ២០១៩។ ថ្មីៗនេះ សុភាព បានចេញបទចម្រៀងផ្ទាល់ខ្លួននៅក្នុងផលិតកម្មហង្សមាសជាលើកដំបូងដែលមានចំណងជើងថា “ម្ចាស់ក្សត្រីយ៍”។
១១. កញ្ញា ចំរើន សុភ័ក្ត្រ៖ គឺជាម្ចាស់ពានដែលមានរហ័ស្សនាមថា “បុប្ផាឆើតឆាយ” ក្នុងកម្មវិធីប្រលងតារាចម្រៀងបិទរបាំងមុខ The Mask Singer រដូវកាលទី១។
១២. កញ្ញា វី ឌីណែត៖ គឺជាម្ចាស់ពានកូនពៅក្តៅៗពីកម្មវិធីប្រលងតារាចម្រៀងអាជីព I Am a Singer Cambodia រដូវកាលទី២ ហើយក៏ជាលើកទី២ដែលកញ្ញាចូលរួមប្រកួត និងត្រូវបានបរាជ័យក្នុងកម្មវិធី The Mask Singer ផងដែរ ប៉ុន្តែតារាស្រីសំឡេងខ្លាំងរូបនេះ នៅតែមិនបោះបង់ការព្យាយាមរហូតដល់បានពានមួយមកកាន់នៅក្នុងដៃ៕