ហ្វាំងឡង់៖ ប្រទេសហ្វាំងឡង់ បានដាក់ពង្រាយសុនខឲ្យហិតក្លិនរកមេរោគកូរ៉ូណា នៅឯអាកាសយានដ្ឋានដ៏សំខាន់ក្នុងប្រទេស សម្រាប់កម្មវិធីសាកល្បងរយៈពេល៤ខែ ដែលចំណាយប្រាក់អស់តិច និងកំណត់អត្ដសញ្ញាណអ្នកដំណើរដែលឆ្លងមេរោគបានយ៉ាងឆាប់រហ័ស។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សសុនខពូជខុសៗគ្នាចំនួន៤ក្បាល បានបណ្ដុះបណ្ដាលដោយសមាគមហិតក្លិនហ្វាំងឡង់ (Finland´s Smell Detection Association) ដែលចាប់ផ្ដើមចុះប្រតិបត្ដិការលើកដំបូងកាលពីថ្ងៃពុធ នៅឯអាកាសយាន្ដដ្ឋាន Helsinki ដើម្បីជាផ្នែកមួយនៃកម្មវិធីសាកល្បង ដែលផ្ដល់ថវិកាដោយរដ្ឋាភិបាល។ ពួកវា ត្រូវបានគេបែកចែកជាពីរក្រុមដើម្បីប្ដូរវេនគ្នា ដោយសុនខចំនួនពីរក្បាលធ្វើការ ខណៈពេលពីរក្បាលទៀតសម្រាក។
ចំពោះអ្នកដំណើរ ដែលយល់ព្រមធ្វើតេស្ដដោយឥតគិតថ្លៃ មិនតម្រូវឲ្យមានទំនាក់ទំនងផ្ទាល់ជាមួយសុនខឡើយ។ ពួកគេតម្រូវឲ្យប្រើក្រណាត់ស្ដើងពណ៌សជូតលើស្បែក បន្ទាប់មកដាក់ចូលកំប៉ុងដែកមួយ ហើយរង់ចាំក្នុងបន្ទប់ដាច់ដោយឡែក ខណៈពេលសុនខកំពុងធ្វើការ។ វាចំណាយពេលត្រឹមតែ១០វិនាទីប៉ុណ្ណោះដើម្បីស្រង់ក្លិន ហើយវានឹងផ្ដល់លទ្ធផលតេស្ដ ដោយការកោសក្រញាំ ព្រុស ឬបញ្ចេញនូវកាយវិកាផ្សេងៗ។ ប្រសិនបើលទ្ធផលចេញមកវិជ្ជមាន នោះអ្នកដំណើរនឹងត្រូវឆ្លងកាត់ការធ្វើតេស្ដដោយម៉ាស៊ីនស្ដង់ដារម្ដងទៀត ដើម្បីផ្ទៀងផ្ទាត់ពីភាពត្រឹមត្រូវរបស់សុនខ។
គួរឲ្យដឹងដែរថា ប្រទេសហ្វាំងឡង់គឺជាប្រទេសទី២ បន្ទាប់ពីប្រទេសអារ៉ាប់រួម និងជាប្រទេសដំបូងគេនៅអឺរ៉ុបដែលប្រើសុនខសម្រាប់ហិតក្លិនរកមេរោគ។ ខណៈអ្នកស្រាវជ្រាវនៃប្រទេសមួយចំនួន រួមមានអូស្ត្រាលី បារាំង អាល្លឺម៉ង់ សហរដ្ឋអាមេរិក កំពុងតែសិក្សាលើសុនខ ឲ្យហិតក្លិនរកមេរោគកូរ៉ូណាផងដែរ៕
សូមទស្សនារូបភាព និងវីដេអូខាងក្រោម៖