យ៉ាងហោចណាស់ត្រីបាឡែន៩០ក្បាលបានស្លាប់ និងរាប់រយក្បាលទៀតកឿងនៅឆ្នេរសមុទ្រ យ៉ាងអាថ៌កំបាំង

អូស្ត្រាលី៖ យ៉ាងហោចណាស់មួយភាគបីនៃត្រីបាឡែនចំនួន២៧០ក្បាល ដែលកឿងនៅឆ្នេរសមុទ្រ Tasmania របស់អូស្ត្រាលីបានស្លាប់ ហើយចំនួនសត្វនៅសល់ត្រូវបានគេភ័យខ្លាចថានឹងស្លាប់ផងដែរ។

ការជាប់កឿងចំនួនយ៉ាងច្រើនបែបនេះនៅឆ្នេរខាងលិចនៃកោះ ត្រូវបានគេរកឃើញកាលពីថ្ងៃចន្ទ។ ក្រុមជីវវិទូផ្នែកសមុទ្រកំពុងខិតខំប្រឹងប្រែង ដើម្បីជួយសង្គ្រោះត្រីបាឡែនដែលនៅសេសសល់ ក្នុងប្រតិបត្តិការដែលពិបាកនិងប្រើពេលច្រើនថ្ងៃ។

គេមិនដឹងថា មានអ្វីដែលរុញច្រានត្រីទាំងនេះឲ្យមកកាន់ឆ្នេរនោះទេ។ ត្រីជាប់គាំងនៅឆ្នេរខ្សាច់គឺជារឿងធម្មតានៅក្នុងតំបន់ ប៉ុន្តែចំនួនដ៏ធំបែបនេះមិនធ្លាប់ត្រូវបានគេមើលឃើញទេ​ តាំងពីឆ្នាំ២០០៩។

ក្រុមអ្នកជួយសង្គ្រោះបានមកដល់កន្លែងកើតហេតុ កាលពីល្ងាចថ្ងៃចន្ទ ដោយរកឃើញសត្វរាប់រយក្បាលទៀត ស្ថិតនៅក្នុងស្ថានភាពគ្រោះថ្នាក់ ដែលត្រូវបានគេប្រទះឃើញពីលើអាកាស។ ការជួយសង្គ្រោះជំហានដំបូងនឹងត្រូវធ្វើឡើង នៅថ្ងៃអង្គារនេះ ប៉ុន្តែក៏មានបញ្ហាក្នុងការចូលទៅដល់ត្រីមួយចំនួនធំ៕