ត្រឹមរយៈពេល១ថ្ងៃសោះ ឥណ្ឌាមានអ្នកស្លាប់ដោយជំងឺកូវីដ១៩ជាង១ពាន់នាក់

ញូដេលី៖ នៅថ្ងៃច័ន្ទនេះក្រសួងសុខាភិបាលសហព័ន្ធឥណ្ឌា បានរកឃើញអ្នកឆ្លងជំងឺកូវីដ១៩ថ្មីចំនួន ៩២,០៧១នាក់ និងអ្នកស្លាប់ ១,១០០នាក់ ដែលធ្វើឱ្យតួលេខអ្នកឆ្លងសរុបឡើងដល់ ៤.៨៥លាននាក់ ខណៈអ្នកស្លាប់សរុបកើនដល់ ៧៩,៧៥៤នាក់។

​ឥណ្ឌាបច្ចុប្បន្នបានឡើងដល់ចំណាត់ថ្នាក់ទី២ ក្លាយជាប្រទេសមានករណីឆ្លងកូវីដ១៩ច្រើនបំផុតនៅលើពិភពលោក គឺបន្ទាប់ពីសហរដ្ឋអាមេរិក។ ហើយស្របពេលដែលករណីឆ្លងថ្មី​កំពុង​បន្តកើនឡើងជារៀងរាល់ថ្ងៃ រដ្ឋាភិបាលប្រទេសនេះបាននឹងកំពុងពិចារណាដាក់ឱ្យប្រើប្រាស់វ៉ាក់សាំងកូវីដ១៩ជាបន្ទាន់ ​​ទៅដល់​ក្រុមមនុស្សប្រឈមនឹងហានិភ័យឆ្លងជំងឺខ្ពស់រួមមាន គ្រូពេទ្យ បុគ្គលិកការពារសន្តិសុខជាតិ ក៏ដូចជា​មនុស្សដែលមានវ័យចំណាស់ជាដើម។

គួរឱ្យដឹងដែរថា ទីតាំងដែលរងគ្រោះខ្លាំងបំផុតដោយសារជំងឺកូវីដ១៩ក្នុងប្រទេសឥណ្ឌានៅពេលនេះ គឺស្ថិតនៅក្នុងរដ្ឋ Maharashtra ជាមួយ​ចំនួនអ្នកឆ្លងកើនឡើងជិតដល់១លាន​នាក់​។ ហើយមូលហេតុដែល​ធ្វើឱ្យ​ករណីឆ្លងកើនឡើង​ គឺទំនង​បណ្តាលមកពីសកម្មភាពបើកដំណើរការសេដ្ឋកិច្ចជាតិឡើងវិញ ការអនុញ្ញាតឱ្យមានរៀបចំពិធីបុណ្យ ក៏ដូចជាការបន្ធូរបន្ថយវិធានការពារជំងឺជាដើម៕