មានករណីព្រះសង្ឃជិត៥០អង្គ នៅខេត្តបាត់ដំបង ក្ដៅខ្លួន ក្អក និងហៀរសំបោរ រយៈពេល៦ថ្ងៃ

បាត់ដំបង៖ យោងតាមទំព័រហ្វេសប៊ុករបស់មន្ទីរសុខាភិបាលខេត្ដបាត់ដំបង នៅព្រឹកថ្ងៃទី១៤ ខែកញ្ញា ឆ្នាំ២០២០នេះ បានឲ្យដឹងថា មានករណីក្តៅខ្លួន​ (កម្ដៅលើស ៣៧,៥ អង្សាសេ) ក្អក និងហៀរសំបោរ​ កើតមានលើព្រះសង្ឃចំនួន​ ៤៦អង្គ ដែលគង់នៅវត្តស្វាយដង្គំ ស្រុកឯកភ្នំ ខេត្ដបាត់ដំបង អស់រយៈពេល ៦ថ្ងៃមកហើយ។

បន្ទាប់ពីទទួលបានព័ត៌មាន​ និងការណែនាំរបស់ឯកឧត្តម​ ងួន​ រតនៈ​ អភិបាលខេត្តបាត់ដំបង​ នៅវេលាម៉ោងជាង​ ១៩:០០នាទីយប់មិញ ក្រុមការងារ​ RRT នៃមន្ទីរសុខាភិបាលខេត្ត ដែលដឹកនាំដោយលោកវេជ្ជបណ្ឌិត​ អ៊ុក​ វិទ្យា​ អនុប្រធានមន្ទីរ​ រួមទាំងលោកប្រធាន​ស្រុកប្រតិបត្តិ​សង្កែ​ និងសហការី​ បានចុះទៅពិនិត្យ​ និងយកសំណាកពីព្រះសង្ឃចំនួន ២១អង្គ​ដែលនៅមានកម្តៅ​ ហើយថ្ងៃនេះ ក្រុមការងារនឹងបន្តចុះយកសំណាកថែមទៀត។

គួរបញ្ជាក់ថា ព្រះសង្ឃទាំង ៤៦អង្គខាងលើ មានព្រះជន្មចន្លោះពី ១១-១៩ព្រះវស្សា  បាននិមន្តពីបណ្ដាខេត្តនានា ដើម្បីមកសិក្សានៅសាលាពុទ្ធិកបឋមសិក្សាក្នុងវត្តនេះ ហើយបច្ចុប្បន្ន ក៏កំពុងទទួលការព្យាបាល និងធូរស្រាលវិញខ្លះៗផងដែរ។ ហើយការកំណត់ស្ថានភាពរួមជាបឋមមិនមានភាពធ្ងន់ធ្ងរទេ​ ប៉ុន្តែមន្ដ្រីជំនាញនឹងត្រូវតាមដានដោយយកចិត្តទុកដាក់បន្តទៀត។

ទន្ទឹមនឹងនេះ ក្រុមការងារក៏បានធ្វើការណែនាំដល់ លោកអាចារ្យ គណៈគ្រប់គ្រងសាលាពុទ្ធិកៈ ឱ្យចេះអនុវត្តនូវវិធានការអនាម័យការពារខ្លួន ពាក់ម៉ាស់ និងឆាន់ទឹកក្តៅផងដែរ៕

សូមទស្សនារូបភាពខាងក្រោម៖

ប្រភព៖ មន្ទីរសុខាភិបាលខេត្ដបាត់ដំបង