ក្នុងនាមជាពុទ្ធសាសនិក នារដូវកាលបុណ្យទានពលរដ្ឋខ្មែរនិយមធ្វើម្ហូបអាហារយកទៅវត្តដើម្បីប្រគេនព្រះសង្ឃដោយប៉ងប្រាថ្នាសុំសេចក្តីសុខ និងឧទ្ទិសកុសលជូនញាតិសន្តានដែលបានចែកឋាន។ ទន្ទឹមនឹងនោះ ភាគច្រើនចាស់ទុំបានណែនាំអ្នកជំនាន់ក្រោយថា ពេលដាក់បាត្រគឺត្រូវប្រយ័ត្នកុំឲ្យស្លាបព្រាប៉ះជាមួយបាត្ររបស់ព្រះសង្ឃ និងរក្សាឥរិយាបថយ៉ាងណាមិនត្រូវឲ្យជ្រុះបាយពីស្លាបព្រាពេលរាប់បាត្រ។ ការអប់រំបែបនោះត្រូវបានយុវជនខ្មែរអនុវត្តន៍តាម ប៉ុន្តែថាតើមូលហេតុអ្វីនៅពីក្រោយការអប់រំរបស់ចាស់ទុំបែបនេះ? ហើយអ្វីជាដំណើរដើមទងនាំឲ្យមានពិធីរាប់បាត្រនេះឡើង?
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សដើម្បីស្រាយចម្ងល់ទាក់ទិននឹងប្រធានបទខាងលើ ក្នុងអំឡុងថ្ងៃកាន់បិណ្ឌនេះ Khmerload បានថ្វាយបង្គំ និងសូមនមស្សការនូវការបកស្រាយពីព្រះតេជគុណ ពេញ វិបុល ជាព្រះសង្ឃនាវត្តបទុមវតី និងជាសាស្ត្រាចារ្យថ្នាក់បណ្តុះគុណធម៌នៃសាកលវិទ្យាល័យបញ្ញាសាស្ត្រកម្ពុជា។
ព្រះតេជគុណបានបញ្ជាក់ថា តាមពិតហេតុផលដើមឡើយចាស់ទុំហាមមិនឲ្យប៉ះបាត្រលោក គឺដោយសារសម័យមុនបាត្រលោកគេធ្វើពីដីដែលការប៉ះ អាចធ្វើឲ្យងាយខូចទ្រង់ទ្រាយ ហើយចាស់ទុំណែនាំមិនឲ្យធ្វេសប្រហែសធ្វើឲ្យបាយជ្រុះចេញពីបាត្រលោកឡើយ គឺដោយសារមិនចង់ឲ្យមានការប្រមាទ។
ព្រះតេជគុណមានសង្ឃដីកាថា៖ «សម័យដើមបាត្រលោកគេធ្វើពីដី ដូច្នេះបើដាក់បាត្រទៅមានការប៉ះនឹងស្លាបព្រា ឬវត្ថុរឹងអាចបែក ឬឆែបបាត្ររបស់ព្រះសង្ឃ។ ម្យ៉ាងទៀតចាស់ទុំលោកថា កុំមានការប្រមាទ ធ្វេសប្រហែសស្មារតីដែលជាហេតុអាចធ្វើឲ្យបាយជ្រុះ ឬខ្ទាតចេញពីបាត្រលោក»។
ព្រះអង្គបន្តថា ចំពោះដំណើរដើមទងដែលនាំឲ្យមានការប្រារព្ធរាប់បាត្រនេះឡើង គឺដោយពុទ្ធសាសនិកយកលំនាំតាមព្រះសារីបុត្រជាអគ្គសាវ័កស្តាំធ្លាប់បានយកចង្ហាន់បិណ្ឌបាត្ររបស់ព្រះអង្គ ទៅប្រគេនព្រះភិក្ខុសង្ឃដើម្បីឧទ្ទិសកុសលដល់ញោមស្រីរបស់លោកដែលបានកើតជាបេតជន (ប្រេត)។
ព្រះតេជគុណ ពេញ វិបុល មានសង្ឃដីកាថា៖ «ការរាប់បាត្រត្រូវគេប្រារព្ធឡើងដោយយកលំនាំព្រះសារីបុត្រជាអគ្គសាវ័កស្តាំធ្លាប់បានយកចង្ហាន់ បិណ្ឌបាត្ររបស់ព្រះអង្គទៅប្រគេនព្រះភិក្ខុសង្ឃដើម្បីឧទ្ទិសកុសលដល់ញោមស្រីរបស់លោកដែលបានកើតជាបេតជន។ ម្យ៉ាងទៀតការឆាន់ចង្ហាន់បិណ្ឌបាត្ររបស់ព្រះភិក្ខុសង្ឃ គឺត្រូវនឹងពុទ្ធានុញ្ញាតដែលតម្រូវឲ្យបួសត្រូវអាស្រ័យនឹងចង្ហាន់បិណ្ឌបាត្រជានិស្ស័យ»។
សាស្ត្រាចារ្យថ្នាក់បណ្តុះគុណធម៌នៃសាកលវិទ្យាល័យបញ្ញាសាស្ត្រ វ័យ ២៨ព្រះវស្សា និងបានបួសជាព្រះសង្ឃតាំងពីនៅកុមារភាពអង្គនេះ បានលើកទឹកចិត្តឲ្យយុវជនគួរសង្រួមកាយ វាចា ចិត្តឲ្យស្ងប់ និងមានសតិស្មារតីប្រុងប្រយ័ត្ន ព្រមទាំងផ្ចង់ចិត្តឧទ្ទិសដល់លោកអ្នកមានគុណក្នុងពេលរាប់បាត្រផងដែរ។
ព្រះតេជគុណ ពេញ វិបុល៖ «យុវជនគួរសង្រួមកាយ និងវាចាចិត្តឲ្យស្ងប់ និងមានសតិស្មារតីប្រុងប្រយ័ត្នដើម្បីកុំមានសេចក្តីប្រមាទកើតឡើងក្នុងខន្ធសន្តាន និងផ្ចង់ចិត្តឧទ្ទិសដល់លោកអ្នកមានគុណ»៕