សំប៊ី៖ ប្រធានាធិបតីនៃប្រទេសសំប៊ី លោក Edgar Lungu បានចូលរួមជាមួយមហាជនក្នុងការកាន់ទុក្ខ ចំពោះការស្លាប់របស់ត្រីដែលរស់នៅក្នុងស្រះមួយ នៅសាកលវិទ្យាល័យធំបំផុតទី២របស់ប្រទេសនេះ។ និស្សិតនៅសាកលវិទ្យាល័យ  Copperbelt (CBU) បានអុជទៀន ហើយដើរជុំវិញបរិវេណសាលា ដើម្បីកាន់ទុក្ខត្រីដ៏ធំនេះ។

អស់រយៈពេលពីរទសវត្សរ៍កន្លងមកនេះ និស្សិតសាកលវិទ្យាល័យ CBU បានជឿថា ត្រីនេះនឹងនាំមកនូវសំណាងដល់ពួកគេក្នុងថ្ងៃប្រលង។ ប្រធាននិស្សិតឈ្មោះ Lawrence Kasonde បាននិយាយថា ត្រី Mafishi ដែលមានន័យថា «ត្រីធំ» ក្នុងភាសាតំបន់នេះ ត្រូវបានគេរាយការណ៍ថា មានអាយុ២២ឆ្នាំហើយធ្លាប់រស់នៅក្នុងស្រះនៃសាកលវិទ្យាល័យ អស់រយៈពេលជាង២០ឆ្នាំ។

ប្រធានសហព័ន្ធនិស្សិតនៃសាកលវិទ្យាល័យ Copperbelt បាននិយាយថា មរណភាពរបស់ត្រីឈ្មោលមួយក្បាលនេះស្ថិតនៅក្រោមការស៊ើបអង្កេតនៅឡើយ។ និស្សិតខ្លះធ្លាប់ទៅបួងសួងចំពោះត្រីមួយក្បាលនេះ មុនពេលប្រលង ដោយជឿថាវានឹងនាំសំណាងដល់ពួកគេ ខណៈអ្នកខ្លះទៀតមកជួបវាដើម្បីកាត់បន្ថយស្ត្រេស។ និស្សិតឆ្នាំទី២ឈ្មោះថា Edwin Nambo បានរៀបរាប់ថា ត្រីនេះជានិមិត្តរូបរបស់សាកលវិទ្យាល័យ។

ចំណែកប្រធានាធិបតី Lungu បានដកស្រង់សម្ដីចេញពីអ្នកធ្វើយុទ្ធនាការប្រឆាំងនឹងអាណានិគមរបស់ឥណ្ឌា លោក មហាត្មគន្ធី នៅក្នុងការបង្ហោះរបស់លោកលើបណ្ដាញសង្គមហ្វេសប៊ុកថា៖ «ភាពអស្ចារ្យនៃប្រជាជាតិមួយ និងវឌ្ឍនភាពខាងសីលធម៌ ក៏អាចវិនិច្ឆ័យបានតាមរយៈការគិតគូរពីសត្វ»៕

ប្រធានាធិបតីនៃប្រទេសសំប៊ី លោក Edgar Lungu
ត្រីនាំសំណាងក្នុងសាកលវិទ្យាល័យ Copperbelt (CBU)
ស្រះដែលត្រីនាំសំណាងមួយក្បាលនេះធ្លាប់រស់នៅ

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក ប្លែកៗ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]