នាយករដ្ឋមន្រ្តីវៀតណាមបានបញ្ជាឲ្យរឿងនេះ ក្រោយរលំខ្លោងទ្វារសាលាសង្កត់សិស្សស្លាប់ ៣នាក់

វៀតណាម៖ លោកនាយករដ្ឋមន្រ្តី ង្វៀនសឺនផូក បានចូលរួមរំលែកទុក្ខដល់ក្រុមគ្រួសារកុមារ ៣ នាក់ ដែលបានស្លាប់ដោយការបាក់រលំខ្លោងទ្វារសាលាសង្កត់ និង ៣ នាក់ផ្សេងទៀតរងរបួសនៅសាលាបឋមសិក្សាមួយ ក្នុងខេត្ត ឡៅកៃ កាលពីថ្ងៃចន្ទ។

យ៉ាងណាមិញនៅកន្លែងកើតហេតុបានឱ្យដឹងថា កាលពីរសៀលថ្ងៃចន្ទ នៅខ្លោងទ្វារនៃសាខាប៊ិនភុង សាលាបឋមសិក្សាខាញ់ថង ស្រុកវាន់ប៊ុនបានដួលរលំភ្លាមៗ ដោយបានសម្លាប់សិស្សសាលាមត្តេយ្យ និងសាលាបឋមសិក្សាចំនួន ៣ នាក់ និង ៣នាក់ផ្សេងទៀតបានរងរបួស។  យោងតាមប្រជាពលរដ្ឋដែលនៅក្បែរនោះបានឱ្យដឹងថា សិស្សទាំងនោះបានលេងជាមួយគ្នានៅជាប់នឹងខ្លោងទ្វារសាលា។

លោកនាយករដ្ឋមន្រ្តីបានបញ្ជាឱ្យគណៈកម្មាធិការ ប្រជាជនខេត្តឡៅកៃ ធ្វើការពិភាក្សាដោយផ្ទាល់ដើម្បីផ្តល់ការព្យាបាលដ៏ល្អបំផុតដល់សិស្សដែលរងរបួស ដោយស៊ើបអង្កេតរកមូលហេតុនៃគ្រោះថ្នាក់កំណត់ការទទួលខុសត្រូវរបស់អង្គការ និងបុគ្គលដែលពាក់ព័ន្ធហើយរាយការណ៍ជូននាយករដ្ឋមន្រ្តី។

ក្រសួងអប់រំ និងបណ្តុះបណ្តាលគណៈកម្មាធិការខេត្ត និងក្រុងដែលគ្រប់គ្រងត្រូវតែពិនិត្យឡើងវិញនូវគុណភាពនៃគ្រឹះស្ថានសិក្សា ជាពិសេសនៅរដូវវស្សាធានាសុវត្ថិភាពសម្រាប់សិស្សចាប់ពីដើមឆ្នាំ  ២០២០-២០២១ ។

លោក ង្វៀនធិញស៊ីញ លេខាគណៈកម្មាធិការបក្សស្រុកវ៉ែនប៊ុនបាននិយាយថា ក្មេងៗដែលរងរបួសដោយសារការបាក់រលំខ្លោងទ្វារសាលា បន្ទាប់ត្រូវបានយកចិត្តទុកដាក់ពីសំណាក់គ្រូពេទ្យនៃមន្ទីរពេទ្យទូទៅស្រុក គឺក្មេងទាំង៣នាក់បានដឹងខ្លួនឡើងវិញហើយ ។

គួរឱ្យដឹងផងដែរថា ភ្លាមៗបន្ទាប់ពីឧប្បត្តិហេតុនេះកើតឡើង ថ្នាក់ដឹកនាំខេត្ត និងថ្នាក់មូលដ្ឋានបានចុះសួរសុខទុក្ខកុមាររងរបួសនៅមន្ទីរពេទ្យ និងបានផ្តល់ថវិកាចំនួន១ លានដុងវៀតណាម។ ពួកគេក៏បានចុះសួរសុខទុក្ខ និងផ្តល់ថវិកាដល់ក្រុមគ្រួសារសិស្សដែលបានស្លាប់នៅក្នុងការបាក់រលំខ្លោទ្វារ និងបានដឹកនាំមន្ទីរមុខងារដើម្បីដោះស្រាយនូវផលវិបាកនៃគ្រោះថ្នាក់នេះផងដែរ៕