ចុមយក្ស! ស្ងាត់ៗ Everton លួចបើកកិច្ចចរចាផ្ទេរយកកីឡាករមិនសូវបានចូលលេងរបស់ R.Madrid រូបនេះ

អង់គ្លេស៖ យោងតាមសេចក្ដីរាយការណ៍បានឲ្យដឹងថា ក្លិបស្ករគ្រាប់ Everton កំពុងខិតជិងក្នុងការផ្ទេរយកខ្សែបម្រើប្រយុទ្ធក្រុម Real Madrid កីឡាករ James Rodriguez ។

ប្រសិនបើកិច្ចព្រមព្រៀងនេះជោគជ័យ នោះ James នឹងត្រូវទៅរួមការងារជាមួយនឹងអ្នកការទូទៅលោក Carlo Ancelotti ជាលើកទី៣ ដោយជម្រើសជាតិកូឡុំប៊ីរូបនេះ ធ្លាប់លេងក្រោមការដឹកនាំរបស់គ្រូបង្វឹកវ័យ៦១ឆ្នាំ ចំនួន២លើកមកហើយ ពោលគឺនៅ Real Madrid និង Bayern Munich ។

ជាមួយគ្នានេះ បើយោងតាមរបាយការណ៍របស់កាសែត Sky Sports ក្លិប Everton បានដាក់សំណើទៅកាន់ Real Madrid ដើម្បីផ្ទេរយក James ។ ខណៈប្រភពដដែលបានឲ្យដឹងទៀតថា ការចរចារវាងក្លិបទាំងពីរកំពុងដំណើរការល្អ ខិតជិតនឹងឈានដល់កិច្ចព្រមព្រៀង។

គួររម្លឹកដែរថា កាលពីរដូវកាល២០១៩/២០ James បង្ហាញខ្លួនក្នុងក្រុមលោក Zinedine Zidane បានត្រឹម១៤ប្រកួត ក្នុងនោះគេរកបាន១គ្រាប់ ខណៈកុងត្រារបស់កីឡាករវ័យ២៩ឆ្នាំរូបនេះ នៅទឹកដី Santiago Bernabéu នៅមានសុពលភាពប្រមាណ១០ខែទៀតប៉ុណ្ណោះ។ យ៉ាងណាមិញ ក្រៅពី Everton ម្ចាស់អាវលេខ១៦ ក៏ជាគោលដៅនាំចូលរបស់ក្លិប Atletico Madrid ផងដែរ៕

ប្រភព៖ skysports