ពិធីចុះហត្ថលេខា លើអនុស្សរណៈនៃការយោគយល់គ្នា រវាងក្រុមហ៊ុន Huawei ថេកណឡជី (ខេមបូឌា) និងមជ្ឈមណ្ឌលអភិវឌ្ឍន៍ភាពជាអ្នកដឹកនាំ និងវិជ្ជាជីវៈ (CLPD) និងសាកលវិទ្យាល័យអាមេរិកាំងភ្នំពេញ (AUPP)

« ក្រុមហ៊ុន Huawei បានធ្វើប្រតិបត្តិការធុរកិច្ចនៅក្នុងប្រទេសកម្ពុជាអស់រយៈពេល ២១ឆ្នាំមកហើយ និងតែងតែប្រកាន់ខ្ជាប់នូវគោលការណ៍ “នៅកម្ពុជាដើម្បីកម្ពុជា”​។ ជានិច្ចកាល យើងបានប្តេជ្ញាចិត្តក្នុងការនាំយកនូវសេវាកម្មផ្នែកឌីជីថល ដើម្បីបម្រើជូនដល់គ្រប់ស្ថាប័ន​ គ្រប់គេហដ្ឋាន ក៏ដូចជាបុគ្គលគ្រប់ៗរូបផងដែរ ដើម្បីកសាងទំនាក់ទំនងដ៏ពេញលេញ កម្ពុជាដ៏ឆ្លាតវៃ។ ក្រុមហ៊ុន Huawei មានសេចក្តីសោមនស្សរីករាយក្នុងការចុះអនុស្សរណៈនៃការយោគយល់គ្នា ជាមួយ សាកលវិទ្យាល័យអាមេរិកាំងភ្នំពេញ (AUPP ) និង មជ្ឈមណ្ឌលអភិវឌ្ឍន៍ភាពជាអ្នកដឹកនាំ និងវិជ្ជាជីវៈ (CLPD ) ស្តីពីកិច្ចសហប្រតិបត្តិការក្នុងការអភិវឌ្ឍវិស័យឌីជីថលនៅកម្ពុជានាពេលអនាគត។ លើសពីនេះទៅទៀត ក្រុមហ៊ុន Huawei ប្រកាន់ខ្ជាប់នូវគោលការណ៍នៃការបណ្តុះបណ្តាលទេពកោសល្យផ្នែកបច្ចេកវិទ្យាព័ត៌មានវិទ្យា ICT talents ក្នុងស្រុកជាអាទិភាព ក៏ដូចជាតែងតែគាំទ្រដល់និស្សិតកម្ពុជា ដើម្បីឱ្យពួកគេត្រៀមខ្លួនរួចជាស្រេចសម្រាប់ការឈានចូលមកដល់នៃយុគសម័យឌីជីថលនាពេលខាងមុខនេះ»។

« ក្រុមហ៊ុន Huawei​ កំពុងបន្តផ្តល់ឱកាសការងារ និងការបណ្តុះបណ្តាលរយៈពេលវែង ដល់ទេពកោសល្យវ័យក្មេងជាច្រើននាក់។ ជាក់ស្តែង​ ទោះស្ថិតនៅក្នុងកំឡុងពេលនៃជំងឺកូវីដ១៩ក៏ដោយ ក៏ក្រុមហ៊ុននៅតែបន្តផ្តល់ឱកាសការងារដល់បុគ្គលិកថ្មីៗចំនួន ​២១រូប ដែលបម្រើការងារនៅផ្នែកហិរញ្ញវត្ថុ ផ្នែកដំណោះស្រាយបច្ចេកវិទ្យាព័ត៌មានវិទ្យា ICT និងផ្នែកទំនាក់ទំនងសាធារណៈ ជាដើម ដែលពួកគេសុទ្ធសឹងតែជានិសិ្សតទើបបញ្ចប់ការសិក្សាពីសាកលវិទ្យាល័យនានា»។

« AUPP និង CLPD ពិតជាមានកិត្តិយសក្នុងការធ្វើកិច្ចសហប្រតិបត្តិការ ជាមួយក្រុមហ៊ុន Huawei ក្នុងការអភិវឌ្ឍគម្រោងបច្ចេកវិទ្យាឌីជីថល និងរួមចំណែកផ្តួចផ្តើមគំនិតដើម្បីជួយជម្រុញដល់ការផ្លាស់ប្តូរផ្នែកឌីជីថល ក៏ដូចជាដើម្បីធ្វើយ៉ាងណាត្រៀមរៀបចំកម្លាំងរួចជាស្រេច សម្រាប់ការអភិវឌ្ឍសេដ្ឋកិច្ចឌីជីថលនៅប្រទេសកម្ពុជា»។