ស្ដាយ Varane បង្កកំហុសអស់២គ្រាប់យប់មិញ! R.Madrid ធ្លាក់ត្រឹមវគ្គ១៦ក្រុម ក្រោយចាញ់ Man City ទាំង២ជើង (មានវីដេអូ)

អង់គ្លេស៖ ក្រុមអធិរាជស Real Madrid បានធ្លាក់ត្រឹមវគ្គ១៦ក្រុមចុងក្រោយពានរង្វាន់​ UEFA Champions League បន្ទាប់ពីបន្តចាញ់ក្រុម Manchester City ទៀតនៅជើងទី២ កាលពីរាត្រីថ្ងៃសុក្រម្សិលមិញ នៅកីឡដ្ឋាន​ Etihad Stadium ដោយលទ្ធផល ២ទល់នឹង១។  

ការប្រកួតចាប់ផ្ដើមបាន៩នាទីខ្សែការពារកណ្ដាលក្រុម Real Madrid កីឡាករ Raphael Varane បានបង្កកំហុសបណ្ដោយឲ្យខ្សែប្រយុទ្ធក្រុមម្ចាស់ផ្ទះកីឡាករ Gabriel Jesus ឆាបបាល់បាន បញ្ជូនឲ្យមិត្តរួមក្រុម Raheem Sterling ស៊ុតបញ្ចូលទីងាយៗនាំមុខមុន១ទល់នឹង០។

រំលេងបាន២០នាទីក្រោយមក ជើងស៊ុតសញ្ជាតិបារាំង Karim Benzema ក៏រកបាន១គ្រាប់ ជួយក្រុមភ្ញៀវតាមស្មើ១ទល់នឹង១ ខណៈលទ្ធផលនេះ បានរក្សារហូតដល់បញ្ចប់តង់ទី១។  

ឈានចូលដល់តង់ទី២ នៅនាទីទី៦៨ Varane បានបង្កកំហុសសាជាថ្មីម្ដងទៀត ដោយរូបគេបានប្រើក្បាលតែតបញ្ជូនបាល់ឲ្យអ្នកចាំទី Thibaut Courtois មិនបានល្អ ត្រូវបានម្ចាស់អាវលេខ៩ Gabriel Jesus​ ឆ្មក់យកបានស៊ុតសម្រេចគ្រាប់ទី២ឲ្យ Man City ដែលជាគ្រាប់ជ័យជម្នះក្នុងការប្រកួតនេះតែម្ដង។

គួររម្លឹកដែរថា កាលពីជើងទី១ នៅទឹកដី Bernabeu ក្រុម Real Madrid បានបរាជ័យក្រោមថ្វីជើង Man City ២ទល់នឹង១ ដូច្នេះបូកសរុបលទ្ធផលទាំងពីរជើង ក្រុមលោក Pep Guardiola ផ្ដួលក្រុមលោក Zidane ៤ទល់នឹង២។

ជាមួយគ្នានេះ សម្រាប់វគ្គ៨ក្រុមចុងក្រោយខាងមុខ រកឃើញ៦ក្រុមហើយដែលនឹងត្រូវប៉ះគ្នា ក្នុងនោះ៖

• ក្រុម Atalantan ត្រូវជួបជាមួយក្រុម Paris Saint-Germain
• ក្រុម RB Leipzig ត្រូវជួបជាមួយក្រុម Atletico Madrid
  
• ក្រុម Manchester City ត្រូវជួយជាមួយក្រុម Lyon
  

ដោយឡែកសម្រាប់១គូទៀត ត្រូវរង់ចាំអ៊ុតមើលលទ្ធផលសម្រាប់ការប្រកួតនៅយប់នេះជាមុនសិន ដោយការប្រកួតនឹងប្រព្រឹត្តិទៅនាវេលាម៉ោង២ រំលងអធ្រាត្រ ក្នុងនោះក្រុម Barcelona ប៉ះជាមួយក្រុម Napoli ខណៈក្រុម Bayern Munich ប៉ះជាមួយក្រុម Chelsea៕

សូមទស្សនាវីដេអូសង្ខេបនៃការប្រកូតខាងក្រោមនេះ៖