បុរសម្នាក់ ខំរៀបចំទៀន១០០ ចេញជាអក្សរសុំមិត្តស្រីរៀបការ មានអី ស្រាប់តែភ្លើងឆេះផ្ទះ

អង់គ្លេស៖ ថ្មីៗនេះ បុរសម្នាក់មានឈ្មោះថា Albert Ndreu អាយុ២៦ឆ្នាំ រស់នៅក្នុងទីក្រុង Sheffield បានរៀបចំការស្នើសុំមិត្តស្រីរៀបការយ៉ាងរ៉ូមែនទិកមួយនៅផ្ទះ ដែលបណ្ដាលឲ្យភ្លើងឆាបឆេះតែម្ដង។

ប្រភពព័ត៌មានបានឲ្យដឹងថា នៅថ្ងៃកើតហេតុ លោក Albert បានចំណាយពេលបួនម៉ោងក្នុងការរៀបចំទៀនតូចៗចំនួនប្រមាណ១០០ នៅក្នុងបន្ទប់ទទួលភ្ញៀវ និងរៀបចេញជាអក្សរ «រៀបការនឹងបងទេ?» លើឥដ្ឋ រួមទាំងមានប៉េងប៉ោងចម្រុះពណ៌ប្រមាណ៦០ផងដែរ។ បន្ទាប់ពីរៀបចំសព្វគ្រប់រួចមក លោកក៏បានចេញទៅខាងក្រៅ ដើម្បីទៅទទួលមិត្តស្រីត្រលប់មកផ្ទះ។

លុះពេលមកដល់ផ្ទះវិញ ក៏ស្រាប់តែឃើញផ្សែងហុយចេញផ្ទះ ទើបលោកនិងមិត្តស្រី ប្រញាប់ប្រញាល់ទូរសព្ទទៅកាន់ភ្នាក់ងារពន្លត់អគ្គិភ័យភា្លមៗ។

ប្រភពបានបន្ដទៀតថា ក្រុមពន្លត់អគ្គិភ័យ បានមកទីតាំងកើតហេតុផ្ទាល់នាវេលាម៉ោង៨:៣០នាទីយប់ ហើយក្រោយពីពន្លត់ភ្លើងរួចមក លោក Albert បានចូលទៅបន្ទប់ទទួលភ្ញៀវជាមួយនឹងមិត្តស្រី និងលុតជង្គង់សុំរៀបការ ទាំងដែលក្នុងដៃកាន់ចិញ្ចៀនមួយវង់។ ហើយជាចុងក្រោយ មិត្តស្រីរបស់លោក មិនបានខឹងឡើយ និងថែមទាំងនិយាយថាយល់ព្រមរៀបការជាមួយលោកផងដែរ។

យ៉ាងណាមិញ ផ្ទះដែលឆាបឆេះនោះមានធានារ៉ាប់រង ហើយឥឡូវនេះ លោក Albert និងមិត្តស្រី បានផ្លាស់ទៅរស់នៅជាមួយនឹងបងប្អូនជីដូនមួយបណ្ដោះអាសន្នសិន។ ហើយពួកគេសង្ឃឹមថានឹងរៀបចំគម្រប់ខួបអគ្គិភ័យនេះនៅឆ្នាំក្រោយ និងអញ្ជើញក្រុមពន្លត់អគ្គិភ័យឲ្យចូលរួមផងដែរ៕

សូមទស្សនារូបភាពខាងក្រោម៖