បៃរូត៖ ចំនួនអ្នកស្លាប់នៅក្នុងហេតុការណ៍ផ្ទុះឃ្លាំងស្តុកសារធាតុអាម៉ូញ៉ូមនីត្រាតនៅក្នុងរដ្ឋធានីបៃរូត បានបន្តកើនឡើងដល់ ១៣៥នាក់ ក្នុងចំណោមអ្នករងរបួសជាង ៥,០០០នាក់ ហើយក្រុមជួយសង្គ្រោះរបស់ប្រទេសលីបង់ នៅតែបន្តតាមប្រមាញ់រក​មនុស្ស​មួយ​ចំនួនទៀតដែលបាន​បាត់ខ្លួន។ នេះបើតាមការចុះផ្សាយរបស់ទីភ្នាក់ងារសារព័ត៌មាន Reuters ។

អ្នករងរបួសក្នុងហេតុការណ៍ផ្ទុះឃ្លាំងស្តុកសារធាតុគីមី

នាយករដ្ឋមន្រ្តី​ប្រទេសលីបង់​បានប្រកាសកាន់ទុក្ខរយៈពេល៣ថ្ងៃ ខណៈការស៊ើបអង្កេតដំបូងបានស្តីបន្ទោសទៅលើការធ្វេសប្រហែស ​ចំពោះសកម្មភាពយកសារធាតុផ្ទុះទៅស្តុកទុកក្នុងឃ្លាំងនៅក្បែរកំពង់ផែអស់រយៈពេល ៦ឆ្នាំ ទាំងមិនមានវិធានការការពារសុវត្ថិភាពឱ្យបានត្រឹមត្រូវ។​ ដោយឡែកអភិបាលក្រុងបៃរូតបានឱ្យដឹងថា ប្រជាជនប្រមាណ ៣០ម៉ឺននាក់ ត្រូវបាត់បង់ផ្ទះសម្បែង ហើយអាជ្ញាធរបាននឹងកំពុងធ្វើការ​ផ្តល់ស្បៀងអាហារ និងទឹក ក៏ដូចជារៀបចំទីជម្រកដល់​ជនរងគ្រោះឱ្យស្នាក់នៅបណ្តោះអាសន្ន។

ក្រុមជំនួយបានប្រមូលផ្តុំនៅកន្លែងផ្ទុះដ៏កក្រើកមួយនៅទីក្រុងបៃរូត ប្រទេសលីបង់កាលពីថ្ងៃទី ៤ សីហា

ហេតុការណ៍ផ្ទុះដ៏ខ្លាំងក្លានេះ បានធ្វើឱ្យកក្រើកនៅក្នុងរដ្ឋធានីបៃរូត ដោយបង្កឲ្យមានការខូចខាត​យ៉ាងច្រើនសន្ធឹកសន្ធាប់ ​ខណៈដែលប្រទេសលីបង់ទើបតែបានធូរស្រាលមួយកម្រិត ពីបញ្ហាធ្លាក់ចុះនៃសេដ្ឋកិច្ចជាតិ ក៏ដូចជា​ការឆ្លងរាតត្បាតនៃជំងឺកាចសាហាវកូវីដ១៩។ ហើយបើតាមការលើកឡើងរបស់អាជ្ញាធរក្នុង​តំបន់​បានឱ្យដឹងថា ចំនួនអ្នកស្លាប់ក្នុងហេតុការណ៍ដ៏អាក្រក់នេះ អាចនឹង​កើនឡើងបន្តទៀត៕

ប្រជាជនរាប់ម៉ឺននាក់ ត្រូវបាត់បង់​ផ្ទះសម្បែង

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ