បរទេស៖ នាយករដ្ឋមន្រ្តីអូស្រ្តាលីលោក ស្កុត ម៉ូរីសុន ( Scott Morrison) បានព្រមានថា ជម្លោះប្រដាប់អាវុធរវាងសហរដ្ឋអាមេរិកនិងចិន គឺអាចនឹងកើតមានឡើង ស្របពេលភាពតានតឹងកំពុងតែកើនឡើងខ្លាំង នៅពេលដំណើរការបោះឆ្នោតសហរដ្ឋអាមេរិកកាន់តែខិតជិតមកដល់។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
នាយករដ្ឋមន្រ្តី ម៉ូរីសុន បានធ្វើការឆ្លើយតបទៅនឹងអត្ថបទមួយ ដែលសរសេរដោយអតីតនាយករដ្ឋមន្ត្រីប្រទេសអូស្ត្រាលីលោក Kevin Rudd កាលពីថ្ងៃអង្គារថា “សង្គ្រាមក្តៅគគុក” រវាងប្រទេសមហាអំណាចទាំងពីរ អាចនឹងផ្ទុះឡើងជាលើកដំបូង ក្រោយពេលសង្គ្រាមកូរ៉េត្រូវបានបញ្ចប់កាលពីឆ្នាំ១៩៥៣។
នៅក្នុងបទសម្ភាសន៍មួយ លោក ម៉ូរីសុន បានលើកឡើងយ៉ាងដូច្នេះថា៖
ខ្ញុំនឹងមិនប្រើឃ្លាថា “សង្គ្រាមក្តៅគគុកនោះទេ” ប៉ុន្តែយើងអាចនិយាយបានថា ជម្លោះប្រដាប់អាវុធរវាងអាមេរិកនិងចិន គឺពិតជាអាចនឹងកើតមានឡើង។ ហើយការធ្វើបច្ចុប្បន្នភាពផ្នែកវិស័យការពារជាតិរបស់យើង គឺមានភាពខុសគ្នាទៅនឹងការលើកឡើងរបស់អតីតនាយករដ្ឋមន្ត្រីលោក Kevin Rudd ។
គួរឱ្យដឹងដែរថា ទំនាក់ទំនងរវាងអាមេរិកនិងចិន បានឈានដល់ដំណាក់កាលយ៉ាប់យ៉ឺនទៅៗ ដោយសារបញ្ហាមួយចំនួនរាប់ចាប់ពី ការឆ្លងរាលដាលនៃជំងឺកូវីដ១៩ ការធ្វើពាណិជ្ជកម្មរបស់ទីក្រុងប៉េកាំង រួមជាមួយសកម្មភាពធ្វើព្យុះធ្វើភ្លៀងរបស់ចិន ដែលមានបំណងចង់ទាមទារទឹកដីនៅសមុទ្រចិនខាងត្បូង ក៏ដូចជាសកម្មភាពបង្កជម្លោះព្រំដែនដ៏ឃោរឃៅនៅជួរភ្នំហិម៉ាឡៃ ដែលបណ្តាលឱ្យទាហានឥណ្ឌាយ៉ាងតិច ២០នាក់ត្រូវស្លាប់៕
Bong I.T