កុំចេះតែហ៊ាន! ពលរដ្ឋឥណ្ឌា៩នាក់បានស្លាប់ បន្ទាប់ពីផឹកទឹកលាងដៃជំនួសស្រា ព្រោះហាងលក់សា្រនានាត្រូវបានបិទដោយសារកូវីដ-១៩

ឥណ្ឌា៖ យោងតាមអាជ្ញាធរឥណ្ឌា កាលពីថ្ងៃសុក្រ ទី៣១ ខែកក្ដដា បានឲ្យដឹងថា មនុស្ស៩នាក់បានស្លាប់ជាបន្ដបន្ទាប់ក្នុងរយៈពេលពីរថ្ងៃចុងក្រោយនេះ ក្រោយពីផឹកទឹកលាងដៃដែលមានជាតិអាល់កុល ពីព្រោះហាងលក់ស្រានានាត្រូវបានបិទដោយសារជំងឺកូវីដ-១៩ រាតត្បាត។

ប៉ូលិសប្រចាំក្រុង Kurichedu នៃរដ្ឋ Andhra Pradesh បានបញ្ជាក់ថា ពួកគេបានសន្លាប់បាត់បង់ស្មារតី បន្ទាប់ពីប្រើប្រាស់ទឹកលាងដៃក្នុងបរិមាណខ្ពស់ ទៅលាយបញ្ជូលគ្នាជាមួយទឹក ឬ សូដា ដើម្បីផឹកជំនួសស្រា។ ក្រោយមកអ្នកទាំងនោះ ក៏ត្រូវបានគេបញ្ជួនទៅសង្គ្រោះនៅមន្ទីរពេទ្យភ្លាមៗផងដែរ ប៉ុន្ដែខាងមន្ទីរពេទ្យបានប្រកាសថាស្លាប់ នៅពេលទៅដល់ទីនោះ។ តែយ៉ាងណាមិញ ការស៊ើបអង្កេតមួយ ក៏ត្រូវបានធ្វើឡើងចំពោះការស្លាប់យ៉ាងឆាប់រហ័សផងដែរ។

គួរឲ្យដឹងដែរថា ជារៀងរាល់ឆ្នាំ ប្រជាជនក្រីក្រនៅប្រទេសឥណ្ឌារាប់រយនាក់ បានស្លាប់ដោយសារពុលស្រា ដែលភាគច្រើនពួកគេតែងតែទទួលទានស្រា ដែលមានតម្លៃថោក ព្រោះស្រាប្រភេទនោះ បានបន្ថែមមេតាណុល ហើយអាល់កុលក៏មានជាពុលខ្ពស់ដែរ។

ដោយឡែក បើគិតមកទល់ថ្ងៃសៅរ៍នេះ ឥណ្ឌាដែលជាប្រទេសរងគ្រោះដោយសារជំងឺកូវីដ-១៩ ខ្លាំងបំផុតទី៣លើពិភពលោក មានករណីឆ្លងសរុបប្រមាណ ១,៧០លាននាក់ ដោយក្នុងនោះ អ្នកស្លាប់មានប្រមាណ ៣៦,៥០០នាក់ និងជាសះស្បើយមានជាង ១លាននាក់៕

រូបតំណាងខាងក្រោម៖