បុរសវ័យ៩៥ឆ្នាំម្នាក់ ទុកសក់ដល់ប្រវែងជាង៧ម៉ែត្រ និងមិនហ៊ានកាត់ចេញ ព្រោះខ្លាចគេលែងគោរព (មានវីដេអូ)

ឥណ្ឌា៖ បុរសវ័យចំណាស់ម្នាក់ឈ្មោះថា Doddapalliad អាយុ៩៥ឆ្នាំ រស់នៅរដ្ឋកាណាតាកា ប្រទេសឥណ្ឌា មានសក់វែងអន្លាយរហូតដល់ទៅ ២៤ហ្វីត (ប្រមាណ៧.៣ម៉ែត្រ) ក្រោយមិនបានកាត់សូម្បីមួយដង អស់រយៈពេលជិត១សតវត្សរ៍។

លោក Doddapalliad ត្រូវបានមនុស្សជាច្រើនរស់នៅទីប្រជុំជន Malakalmuru ទីក្រុង Chitradurga ដែលជាស្រុកកំណើតរបស់គាត់ គោរពជាអាទិទេព។ បុរសវ័យចំណាស់រូបនេះ ជឿជាក់ថាខ្លួនគាត់គឺជាអាទិទេពរបស់មនុស្សពិតមែន ហើយគាត់មិនដែលកាត់សក់ឡើយ ព្រោះខ្លាចបាត់បង់ឋានៈជាព្រះរបស់មនុស្ស។

នៅក្នុងឃ្លីបវីដេអូមួយ បង្ហាញឲ្យឃើញថា លោក Doddapalliad មានសភាពទ្រុឌទ្រោម ហើយហាក់ដូចជាកំពុងឈឺទៀតផង នៅពេលបុរសពីរនាក់ លាសក់របស់គាត់ ដើម្បីថតរូប។

គួរឲ្យដឹងដែរថា លោក Doddapalliad មិនមែនជាជនជាតិឥណ្ឌាតែម្នាក់នោះទេ ដែលខានកាត់សក់អស់រយៈពេលរាប់សិបឆ្នាំបែបនេះ តែក៏មានបុរសម្នាក់ទៀតជាជនជាតិឥណ្ឌាដូចគ្នាឈ្មោះថា Savjibhai Rathwa មានប្រវែងសក់១៩ម៉ែត្រឯណោះ និងជនជាតិចិនម្នាក់ផងដែរ ឈ្មោះថា Ake Yizheng មានសក់ប្រវែង៥.៥ម៉ែត្រ ក្រោយមិនបានកាត់ចេញរយៈពេល៥៤ឆ្នាំ៕

សូមទស្សនារូបភាពនិងវីដេអូខាងក្រោម៖