មានរឿងអ្វីនឹង! អ្នកលេងលើសង្វៀន UFC ម្នាក់បានវាយបុរសម្នាក់ទៀតឲ្យសន្លប់ក្នុងភោជនីយដ្ឋានមួយកន្លែង (មានវីដេអូ)

បរទេស៖ វីដេអូមិនគួរឲ្យយកតម្រាប់តាមមួយ បានបែកធ្លាយកាលពីពេលថ្មីៗ ដោយតារាប្រចាំស្ថាប័ន UFC កីឡាករ Mike Perry បានដាល់បុរសវ័យចំណាស់ម្នាក់ នៅខាងក្រៅភោជនីយដ្ឋានមួយក្នុងរដ្ឋ Texas។

បើតាមរបាយការណ៍របស់ប៉ូលីសបានអះអាងថា បុរសនោះបានសន្លប់បាត់ស្មារតី បន្ទាប់ពីត្រូវបានវាយដោយ Perry ក្រោយមានជម្លោះពាក្យសម្ដីដ៏ក្តៅគគុក។ ហេតុការណ៍នេះបានកើតឡើងនៅតុលេខ៨២ ភោជនីយដ្ឋាន Lubbock ប្រហែលម៉ោង១០កន្លះ យប់ថ្ងៃអង្គារកន្លងទៅ។

នៅក្នុងវីដេអូ Perry ដែលជាកីឡាករ UFC ធ្លាប់ប្រកួតដល់ទៅ២០ដង ឈ្នះ១៤ដង ត្រូវបានគេសុំឲ្យចាកចេញពីកន្លែងអង្គុយញ៉ាំអី បន្ទាប់ពីមានជម្លោះជាមួយអ្នករួមតុជាមួយគាត់។ ក្រោយមក Perry ក៏មានប្រតិកម្មយ៉ាងខ្លាំង រួចបានដាល់អ្នកបម្រើនោះចំភ្នែក មុននារីម្នាក់ទៀតដែលសន្មតថាជាសង្សារគាត់ នាំគាត់ចេញពីទីនោះ។

យ៉ាងណាមិញ មុនពេលចាកចេញ ក៏មានការសួរនាំពីសំណាក់បុរសវ័យចំណាស់ម្នាក់ បន្ទាប់មក Perry ក៏បានវាយបុរសនោះ សន្លប់ស្ដូកស្ដឹងម្នាក់ទៀត ក្រោយកើតហេតុគេក៏បាននាំបុរសរងគ្រោះទៅមន្ទីរពេទ្យ ប៉ូលីសក៏បានមកដល់ ហើយក៏បានសរសេរសំណុំរឿងនេះ ប៉ុន្តែគេមិនបានឃើញមានការឃាត់ខ្លួន Perry នៅឡើយទេ។

យ៉ាងណាក្ដី ជុំវិញ​បញ្ហាទំនាស់នេះ Perry បានបកស្រាយទៅខាងប៉ូលីសយ៉ាងដូច្នេះថា៖ " មកពីគេនាំគ្នាយកដៃមកចាប់ខ្ញុំ អំឡុងពេលខ្ញុំព្យាយាមចាកចេញពីទីនោះ "។ 

វីដេអូបង្កហិង្សា របស់ Mike Perry៖

ប្រភព៖ The Sun