រថភ្លើងពីរគ្រឿងបុកគ្នាពេញទំហឹង​ បណ្តាលឲ្យមនុស្ស២នាក់ស្លាប់ និង២៤នាក់រងរបួស

ប្រាក៖ យ៉ាងហោចណាស់​មានមនុស្ស ២នាក់បានស្លាប់ និង ២៤នាក់​រងរបួស បន្ទាប់ពីរថភ្លើងចំនួន ២គ្រឿងបានបុកគ្នាពេញទំហឹង នៅភាគពាយព្យក្នុង​សាធារណរដ្ឋឆេក ក្បែរព្រំដែនជាមួយប្រទេសអាល្លឺម៉ង់ កាលពីថ្ងៃអង្គារកន្លងទៅ។ នេះបើយោងតាមការផ្សាយរបស់ទីភ្នាក់ងារសារព័ត៌មាន Reuters ។

ប្រភពដដែល​បន្តថា ឧប្បត្តិហេតុនេះបានកើតឡើង​នៅវេលាម៉ោង ៣រសៀល ក្បែរពីស្ថានីយ៍ Pernink ដែលមានចម្ងាយប្រហែល ១០គីឡូម៉ែត្រពីប្រទេសអាល្លឺម៉ង់។ ហើយបើយោងតាមអ្នកនាំពាក្យសេវាកម្មសង្គ្រោះក្នុងតំបន់បាននិយាយថា ចំនួនអ្នករងរបួសអាចនឹងកើនឡើងដល់ ៣០នាក់។

គួរជម្រាបផងដែរថា នៅក្នុងចំណោមអ្នកស្លាប់និងរបួស ដោយសារគ្រោះថ្នាក់រថភ្លើងនេះ ក៏មានជនជាតិអាល្លឺម៉ង់ដែរ។ ហើយបច្ចុប្បន្ន អ្នកដែលរងរបួសធ្ងន់ស្រាលទាំងអស់ ត្រូវបានគេបញ្ជូនទៅសម្រាកព្យាបាលនៅឯមន្ទីរពេទ្យ៕