វីវរហើយ! បទថ្មីរបស់ Blackpink រងការរិះគន់ពីសំណាក់ប្រជាជនឥណ្ឌាត្រង់ឈុតមួយនេះ

កូរ៉េខាងត្បូង៖ វីដេអូបទចម្រៀង How You Like That របស់ក្រុមតារាចម្រៀងស្រីឈ្មោះល្បី Blackpink នៅខណៈពេលនេះបានក្លាយទៅជាវីដេអូចម្រៀងដ៏ល្បីមួយ និងបានបំបែកកំណត់ត្រាជាវីដេអូចម្រៀងដែលមានចំនួនការចូលទស្សនាច្រើនជាងគេលំដាប់ទី១ នៅក្នុងរយៈពេល២៤ម៉ោង នៅលើបណ្ដាញសង្គមយូធូប។ អ្នកគាំទ្រភាគច្រើនបានសរសើរមិនដាច់ពីមាត់ថា វីដេអូចម្រៀងមួយនេះ គឺពិតជាពិសេសខ្លាំងណាស់ មិនថាតែលើសាច់ភ្លេង បញ្ចេញក្នុងការថត ការរៀបចំឆាក និងការតែងខ្លួនរបស់តារាចម្រៀងស្រីទាំងបួននោះឡើយ។

ទន្ទឹមនឹងការសរសើរ ក៏ដូចជាការគាំទ្រ ស្រាប់តែនៅពេលនេះ វីដេអូបទចម្រៀង How You Like That បែរជាទទួលរងនូវការរិះគន់ពីសំណាក់ប្រជាជនឥណ្ឌា រហូតដល់ក្លាយទៅជាប្រធានបទនិយមនៅលើ Twitter ត្រង់ចំណុចមួយ ដែល Lisa កំពុងច្រៀងរ៉េប គេកត់សម្គាល់ឃើញមាន ការតាំងរូបបដិមាព្រះហ្គេណេស ដែលជាព្រះអាទិទេពដ៏ខ្ពង់ខ្ពស់នៅក្នុងជំនឿរបស់ប្រជាជនឥណ្ឌា នៅក្បែរកៅអីដែល Lisa អង្គុយ។ ពួកគេបានលើកឡើងថា ការរៀបចំឆាកបែបនេះ គឺជាការប្រមាថយ៉ាងធ្ងន់ធ្ងរទៅដល់ព្រះអាទិទេពអង្គនេះ ក៏ដូចជាប្រមាថជំនឿវប្បធម៌របស់ឥណ្ឌាផងដែរ។ ពួកគេបានទាមទារឲ្យក្រុមហ៊ុន YG Entertainment ចេញមុខសុំទោសជាបន្ទាន់ ចំពោះកំហុសដ៏ធំមួយនេះ។

គួរបញ្ជាក់ផងដែរថា អ្នកគាំទ្រមួយចំនួនពុំបានវាយប្រហារទៅលើក្រុម Blackpink ជាពិសេស Lisa នោះឡើយ ព្រោះពួកគេយល់ថា តារាចម្រៀងក្នុងក្រុមដ៏ល្បីមួយនេះ ធ្វើតាមការរៀបចំរបស់ខាងអ្នកផលិត និងដឹកនាំតែប៉ុណ្ណោះ មិនមែនជាចេតនាផ្ទាល់របស់ពួកគេនោះទេ៕

សូមទស្សនារូបភាពខាងក្រោម៖

ប្រភព​​​៖ TeeNee

• ចម្រៀង
• រូបភាព
• តារាកូរ៉េ