ថៃ និងមីយ៉ាន់ម៉ា​ កម្ទេច​​គ្រឿង​ញៀន​​គិតជា​​លុយ​អស់​ខ្ទង់​ជាង​ ២ ពាន់លាន​ដុល្លារ​​ ប្រើពេលត្រឹមមួយថ្ងៃ

អាជ្ញាធរក្នុងប្រទេសមីយ៉ាន់ម៉ា និងថៃនិយាយថា ពួកគេបានបំផ្លាញគ្រឿងញៀនខុសច្បាប់ បើគិតជាប្រាក់មានតម្លៃ​ជាង ២ ពាន់លានដុល្លារ នៅក្នុងការរឹបអូស​គ្រឿងញៀនខុសច្បាប់​កាលពីថ្ងៃទី ២៦ ខែមិថុនាឆ្នាំ ២០២០។ ការរឹបអូសនេះធ្វើឡើងដើម្បី​ប្រារព្ធទិវាអន្តរជាតិប្រឆាំងការរំលោភបំពានគ្រឿងញៀន និងការជួញដូរខុសច្បាប់ ដែលស្ថិត​នៅទីក្រុងបាងកក និងខេត្តអយុធ្យានៅភាគខាងជើងប្រទេសថៃ។

មន្ត្រីរដ្ឋាភិបាលថៃបានដុតបំផ្លាញគ្រឿងញៀនដែលរឹបអូសបានចំនួន ២៥ តោនរួមមាន ម៉ាទឹកកក ថ្នាំញៀន កូកាអ៊ីន​និងហេរ៉ូអ៊ីន។

ចំណែកនៅរដ្ឋធានីយ៊ាំងហ្គោន កម្លាំងនរគបាលជាតិបានដុតបំផ្លាញគ្រឿងញៀនដែលរឹបអូសបានមានតម្លៃ ១៤៤ លានដុល្លារ។ ឃ្លាំងស្តុកគ្រឿងញៀន ដែលត្រូវបានរឹបអូសក៏ត្រូវបានបំផ្លាញផងដែរ​នៅក្នុងទីក្រុងម៉ាន់ដាឡេ ឡាស៊ីយ៉ូ និងរដ្ឋធានីសានតាជីជី។

អាជ្ញាធរបាននិយាយថាប្រទេសនេះ ​នៅតែជាប្រទេសផលិតហេរ៉ូអ៊ីនធំទី ២ និងជាប្រភពនៃ​ថ្នាំមេតំហ្វេតាមីន​ភាគច្រើន​នៅអាស៊ីអាគ្នេយ៍ដែលផលិតនៅតំបន់ព្រំដែនក្រៅការគ្រប់គ្រងរបស់រដ្ឋាភិបាល។មហាសន្និបាតអង្គការសហប្រជាជាតិបានអនុម័តសេចក្តីសម្រេចចិត្តមួយនៅឆ្នាំ ១៩៨៧ ដោយកំណត់យកថ្ងៃទី ២៦ ខែមិថុនា ជាទិវាអន្តរជាតិប្រឆាំងនឹងការរំលោភបំពានគ្រឿងញៀន និងការជួញដូរខុសច្បាប់ដែល​ជាការបង្ហាញ​នូវការ​ប្តេជ្ញា​ចិត្តរបស់ខ្លួនក្នុងការពង្រឹងសកម្មភាព និងកិច្ចសហប្រតិបត្តិការដើម្បីសម្រេចគោលដៅ​នៃសង្គមអន្តរជាតិ​មួយ​ដែលគ្មានគ្រឿងញៀន៕