មិនចាញ់ប្រទេសផ្សេងទៀត! ក្នុងរយៈពេលតែ ២៤ ម៉ោងប្រទេសអ៊ុយក្រែនមានអ្នកឆ្លងជំងឺ COVID-១៩ ថ្មីជាង១ពាន់ករណី

អ៊ុយក្រែន៖ ក្រសួងសុខាភិបាលរបស់ប្រទេសអ៊ុយក្រែនបាននិយាយនាថ្ងៃសុក្រនេះថា ករណីឆ្លងជំងឺ COVID-១៩ សរុបមានចំនួន ៤១,១១៧ ករណី និងមានអ្នកស្លាប់ចំនួន ១,០៨៦ នាក់ត្រូវបានរាយការណ៍នៅក្នុងប្រទេសអ៊ុយក្រែន ខណៈអ្នកជំងឺ ១៨,២៩៩ នាក់បានជាសះស្បើយឡើងវិញ។

គិតត្រឹមថ្ងៃសុក្រនេះ អ្នកដែលបានឆ្លងជំងឺថ្មីចំនួន ១,១០៩ នាក់បានធ្វើតេស្តរកឃើញវីរុសកូរ៉ូណា នៅប្រទេសអ៊ុយក្រែនក្នុងរយៈពេល ២៤ ម៉ោងចុងក្រោយ។

ទន្ទឹមនឹងនេះដែរ កុមារចំនួន ៣,០៧១ នាក់ និងបុគ្គលិកសុខាភិបាលចំនួន ៦,២២០ នាក់ត្រូវបានគេធ្វើរោគវិនិច្ឆ័យរកជំងឺ COVID-១៩ ចាប់តាំងពីមានការផ្ទុះឡើងនៃជំងឺនេះ នៅក្នុងប្រទេសអ៊ុយក្រែន។

គួរបញ្ជាក់ផងដែរថា ចំនួននៃអ្នកឆ្លងជំងឺ COVID-១៩ បាននឹងកំពុងកើនឡើងនៅប្រទេសអ៊ុយក្រែន នាពេលថ្មីៗនេះ ដោយរដ្ឋាភិបាលអ៊ុយក្រែនបានបង្កើនការចាត់វិធានការណ៍សម្រាប់ការទប់ស្កាត់រហូតដល់ថ្ងៃទី ៣១ ខែកក្កដា៕

ប្រភព៖ ទីភ្នាក់ងារសារព័ត៌មានស៊ីនហួរ