ថៃ៖ ខ្សែភាពយន្តភាគថៃ បែបជីវិតយុវវ័យជាសិស្សសាលា Hormones The Series គឺជារឿងមួយដែលធ្លាប់ទទួលបានការគាំទ្រយ៉ាងខ្លាំងកាលពី៧ឆ្នាំមុន និងមានសាច់រឿងរហូតដល់ទៅ ៣រដូវកាល។ រឿងនេះ ស្ថិតក្រោមការផលិតរបស់ផលិតកម្ម GTH ដែលក្រោយមកបានបិទទ្វារ ហើយបំបែកខ្លួនទៅជាផលិតកម្ម GDH 559 វិញ។ តារាសម្ដែងវ័យក្មេងជាច្រើនដែលបានចូលរួមសម្ដែងក្នុងរឿងភាគមួយនេះ សុទ្ធសឹងតែទទួលបានការគាំទ្រយ៉ាងខ្លាំង និងបានក្លាយទៅអាយដលសម្រាប់ហ្វេននៅក្រៅប្រទេសទៀតផង។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សប៉ុន្តែ ក្រុមតារាសម្ដែងរឿង Hormones The Series នេះ មិនបានស្ថិតនៅទ្រនំជាមួយគ្នាដូចមុនទៀតឡើយ។ ក្នុងនោះ តារាភាគច្រើនបានសម្រេចបញ្ចប់កុងត្រាជាមួយផលិតកម្ម GDH ហើយក្លាយខ្លួនជាតារាឯករាជ្យ។ ចំណែកឯ Peach Pachara និង Kao Supassra បានចុះកុងត្រាជាមួយនឹងស្ថានីយ៍ទូរទស្សន៍ថៃប៉ុស្តិ៍លេខ៣។
អ្វីដែលគួរឲ្យរំភើបបំផុតនោះ សម្រាប់ខួបគម្រប់៧ឆ្នាំនៃការចាក់បញ្ចាំងរឿង Hormones The Series នេះ ក្រុមការងារផលិតរឿងបានអញ្ជើញតារាសម្ដែងសំខាន់ៗចំនួន១២រូប នៅក្នុងរឿង Hormones The Series រដូវកាលទីមួយ និងទីពីរ មកជួបជុំគ្នាតាមរយៈកម្មវិធី Zoom។ ទិដ្ឋភាពមួយនេះ គឺពិតជាគួរឲ្យរំភើបមែនទែន ដែលអាចឆ្លុះបញ្ចាំងឲ្យឃើញបានថា ទោះបីជាតារាទាំង១២រូប បានចាកចេញទៅដើរតាមវិថីសិល្បៈរៀងៗខ្លួនក៏ដោយ ក៏ពួកគេនៅតែរក្សាបានចំណងមិត្តភាពល្អជាមួយគ្នា ហើយក៏មិនភ្លេចទីកន្លែងចាស់ ដែលបានផ្ដល់ឱកាសឲ្យពួកគេអាចឈានជើងចូលមកក្នុងវិស័យសិល្បៈបែបនេះនោះឡើយ៕
សូមទស្សនាវីដេអូ និងរូបភាពខាងក្រោម៖