ផលិតកម្ម Phleng Record គឺជាបុត្រសម្ព័ន្ធរបស់ផលិតកម្មរស្មីហង្សមាស ដែលបានបង្កើតឡើងកាលពីកំឡុងឆ្នាំ២០១៣ គាំទ្រការផលិត និពន្ធ ដឹកនាំ និងគ្រប់គ្រងទូទៅដោយលោក សុខ ជំនោរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សយ៉ាងណាមិញផលិតកម្ម Phleng Record ហាក់មិនសូវទទួលបានការគាំទ្រខ្លាំងក្លាដូចផលិតកម្មរស្មីហង្សមាសនោះទេ បើទោះបីជានៅក្នុងផលិតកម្មមានធនធានដែលមានសមត្ថភាពរហូតដល់ទៅ ១០រូប ក៏ដោយ។
ថ្ងៃនេះយើងខ្ញុំចង់បង្ហាញពីការវិវត្តរបស់តារាចម្រៀងទាំង១០រូប នៅក្នុងផលិតកម្ម Phleng Record ថា តើពួកគេទាំងអស់គ្នាបានធ្វើដំណើរនៅលើវិថីសិល្បៈដល់ចំណុចណាហើយ?
១. កញ្ញា លាង សុផាឡែន
តារាចម្រៀង លាង សុផាឡែន បានក្លាយជាតារាចម្រៀងគោលមួយរូបនៅក្នុងផលិតកម្ម Phleng Record ហើយក៏ទទួលបានការគាំទ្រយ៉ាងខ្លាំងក្លាផងដែរពីសំណាក់អ្នកគាំទ្រ ដោយសារតែកញ្ញាធ្លាប់ទទួលបានភាពល្បីល្បាញកន្លងមកហើយនៅក្នុងផលិតកម្ម Big Man។
២. លោក ម៉ានិត
អ្នកនិពន្ធសៀវភៅប្រលោមលោក អ្នកនិពន្ធបទភ្លេង អ្នកនិពន្ធទំនុកច្រៀង និងតារាចម្រៀង ម៉ានិត បានសម្រេចចិត្តចាកចេញពីផលិតកម្ម Phleng Record ក្រោយបញ្ចប់កុងត្រាដែលមានរយៈពេល៥ឆ្នាំជាមួយផលិតកម្ម ហើយបានក្លាយខ្លួនជាតារាចម្រៀងឯករាជ្យសារជាថ្មីម្តងទៀត។
៣. កញ្ញា គៀត សុវណ្ណាឡាង
មុនពេលក្លាយខ្លួនជាតារាចម្រៀងនៅក្នុងផលិតកម្ម Phleng Record កញ្ញា គៀត សុវណ្ណាឡាង គឺជាតារាសម្តែងដែលទទួលបានការគាំទ្រយ៉ាងខ្លាំង។ កញ្ញាបានសម្រេចចិត្តបញ្ឈប់ការសម្តែង ហើយផ្លាស់ប្តូរមកធ្វើជាតារាចម្រៀងកុងត្រានៅក្នុងផលិតកម្ម Phleng Record ប៉ុន្តែដោយមើលឃើញពី សន្ទុះការគាំទ្រលើបទចម្រៀងហាក់មិនរលូននោះ ក្រោយបញ្ចប់កុងត្រាកញ្ញាក៏បានលាឈប់ពីឈ្មោះជាតារាចម្រៀង ដើម្បីត្រលប់ទៅធ្វើជាតារាសម្តែងដូចកាលពីមុនរហូតមកដល់សព្វថ្ងៃនេះ។
៤. លោក K-ICE
លោក K-ICE គឺជាប្អូនប្រុសបង្កើតរបស់លោក ហ្សូណូ ហើយបច្ចុប្បន្ននេះលោកនៅតែជាតារាចម្រៀងនៅក្នុងផលិតកម្ម Phleng Record ដដែល។ បទចម្រៀងរបស់លោកភាគច្រើន គឺជាការនិពន្ធឡើងដោយខ្លួនឯងតែម្តង។
៥. កញ្ញា អេម៉ា
កញ្ញា អេម៉ា អតីតតារាចម្រៀងដែលមកពីផលិតកម្មមហាហង្សរូបនេះក៏បានបញ្ឈប់កុងត្រាជាមួយផលិតកម្ម Phleng Record ដែរ។ កញ្ញាបានប្រកាសថានឹងធ្វើជាតារាចម្រៀងឯករាជ្យ ដោយមិនចំណុះឱ្យផលិតកម្មណាមួយបន្តទៀតនោះទេ។
៦. លោក វីខេន
លោក វីខេន ក៏មិនខុសពីកញ្ញា គៀត សុវណ្ណាឡាង នោះដែរ ព្រោះពេលចូលសិល្បៈដំបូងលោកគឺជាតារាសម្តែងបទចម្រៀងខារ៉ាអូខេ ដែលភាគច្រើនជាបទចម្រៀងនៅក្នុងផលិតកម្មថោន។ ក្រោយមិនទទួលបានការគាំទ្រលើបទចម្រៀងដែលលោកច្រៀងនៅក្នុងផលិតកម្ម Phleng Record លោកក៏បានលាឈប់ពីផលិតកម្ម។
៧. កញ្ញា ប្រេម៉ា
តារាចម្រៀងដែលមានរូបរាងតូចច្រឡឹងកញ្ញា ប្រេម៉ា សព្វថ្ងៃនៅតែឈរជើងនៅក្នុងផលិតកម្ម Phleng Record ដដែល ប៉ុន្តែកញ្ញាហាក់មិនសូវទទួលបាននូវបទចម្រៀងថ្មីៗនោះទេ។ គួរឱ្យកត់សម្គាល់ថាបទចម្រៀងចុងក្រោយដែលកញ្ញាទទួលបានការគាំទ្រខ្លាំងមានចំណងជើងថា “Sad Life”។
៨. លោក ម៉ាទីន
តារាចម្រៀងដែលមានមាឌធំលោក ម៉ាទីន ហាក់មិនទទួលបានការលើកស្ទួយពីម្ចាស់ផលិតកម្មនោះទេ។ បច្ចុប្បន្នលោកកំពុងតែចាប់នូវអាជីពជាអ្នកលក់ម៉ូតូ និងផលិតផលថែរក្សាសម្រស់ទៅវិញ ក្រោយស្ងប់ស្ងាត់ពីការងារសិល្បៈ។
៩. កញ្ញា វ៉ាន់ នីឡា
កញ្ញា វ៉ាន់ នីឡា គឺជាប្អូនស្រីបង្កើតរបស់អ្នកនិពន្ធ សុខ ជំនោរ។ កញ្ញាក៏បានបាត់មុខពីសិល្បៈទាំងស្រុងដែរ ក្រោយមានរឿងអាស្រូវជាមួយនឹងសង្សារ។
១០. លោក ដួង វិរៈសិទ្ធ
ម្ចាស់ពានរង្វាន់កម្មវិធី I am a Singer Cambodia បច្ចុប្បន្ននៅទទួលបានការងារមួយៗនៅក្នុងផលិតកម្ម។ លោក ដួង វិរៈសិទ្ធ ក៏ធ្លាប់បានធ្វើជាគណៈកម្មការកិត្តិយសនៅក្នុងកម្មវិធី X Factor Cambodia និងកម្មវិធី The Mask Singer Cambodia ផងដែរ។ បទចម្រៀងរបស់លោកដែលទទួលបានការគាំទ្រខ្លាំងមានចំណងជើងថា “ចិញ្ចៀនផ្កាស្មៅ”។
គួររំលឹកឡើងវិញថាពាក្យស្លោកនៅក្នុងផលិតកម្ម Phleng Record ដែលអ្នកគាំទ្រមួយចំនួននៅតែចងចាំនោះគឺ “Phleng Record It’s not silent”។ បច្ចុប្បន្ននេះផលិតកម្ម Phleng Record ក៏បានបញ្ចូលអតីតបេក្ខភាពប្រឡងក្នុងកម្មវិធី Cambodian Idol រដូវកាលទី២ ចំនួន២រូបបន្ថែមទៀតផងដែរ គឺ លោក នួន សុធារ័ក្ស និងកញ្ញា ម៉ង់ ចាន់កញ្ញា៕