បរទេស៖ ដោយមានចម្ងាយប្រមាណ៣,០០០ឆ្នាំពន្លឺពីផែនដី ក្រុមអ្នកស្រាវជ្រាវជឿថា ពួកគេបានរកឃើញភពផែនដីមួយទៀត ដែលមានលក្ខណៈស្រដៀងនឹងភពរបស់យើង ដែលកំពុងធ្វើដំណើរជុំវិញផ្កាយមួយ ដែលមានលក្ខណៈដូចព្រះអាទិត្យរបស់យើងដែរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សផ្កាយនេះត្រូវបានគេហៅថា Kepler-160 ហើយវាត្រូវបានគេអង្កេត នៅក្នុងបេសកកម្មស្វែងរកភពក្រៅប្រព័ន្ធព្រះអាទិត្យ ក្នុងចន្លោះឆ្នាំ២០០៩និង២០១៣។ វាមានទំហំនិងសីតុណ្ហភាពស្រដៀងនឹងព្រះអាទិត្យរបស់យើងដែរ។
ការសង្កេតពីមុន រយៈពេល៦ឆ្នាំចុងក្រោយនេះ បានបង្ហាញថា ផ្កាយ Kepler-160 ត្រូវបានវិលជុំវិញដោយភពចំនួនពីរគឺ Kepler-160b និង Kepler-160c។ ប៉ុន្តែពួកវាទាំងពីរនេះមានទំហំធំជាងផែនដី និងគោចរជុំវិញផ្កាយដែលធ្វើឲ្យសីតុណ្ហភាពនៅលើផ្ទៃរបស់វា ក្ដៅខ្លាំងនិងមិនអាចរស់នៅបាន។
ទោះជាយ៉ាងណា មានការផ្លាស់ប្ដូររយៈពេលនៃដំណើរគោចររបស់ភព Kepler-160c ដែលគេសង្ស័យថា អាចនឹងមានភពទី៣នៅក្នុងប្រព័ន្ធផ្កាយមួយនេះ។ ផ្ទុយទៅវិញ ក្រុមតារាវិទូមិនមែនរកឃើញភពថ្មីមួយទៀតនោះទេ ប៉ុន្តែភពថ្មីចំនួនពីរទៀត។
នៅក្នុងសេចក្ដីថ្លែងការណ៍មួយ លោក René Heller អ្នកដឹកនាំការសិក្សាបាននិយាយថា៖ «ការវិភាគរបស់យើងបានបង្ហាញថា ផ្កាយ Kepler-160 គឺមិនត្រូវបានវិលជុំវិញដោយភពចំនួនពីរទេ ប៉ុន្តែសរុបទាំងអស់ចំនួន៤។»
ភពទីបីគឺ Kepler-160d ដែលទទួលខុសត្រូវក្នុងការបង្វែរគន្លងរបស់ភព Kepler-160c។ ចំណែកភពមួយទៀត មានលក្ខណៈស្រដៀងនឹងផែនដីរបស់យើង ហើយវាត្រូវបានគេដាក់ឈ្មោះថា KOI-456.04។ វាមានទំហំតូចជាងផែនដីរបស់យើងចំនួនពីរដង និងទទួលបានបរិមាណនិងប្រភេទនៃពន្លឺប្រហាក់ប្រហែលនឹងព្រះអាទិត្យរបស់យើងដែរ។
ភពមួយនេះកំពុងធ្វើដំណើរគោចរ នៅរយៈចម្ងាយដែលអាចរស់នៅបាន ដោយសីតុណ្ហភាពនៅលើភពនេះអាចទ្រទ្រង់ទឹករាវ និងល្អសម្រាប់ភាវៈមានជីវិត។ នោះស្រដៀងគ្នានឹងកន្លែង ដែលផែនដីរបស់យើងស្ថិតនៅ ពីព្រះអាទិត្យ។ មិនតែប៉ុណ្ណោះ វាមានគន្លងគោចរជុំវិញផ្កាយ ៣៧៨ថ្ងៃ ប្រហាក់ប្រហែលនឹងមួយឆ្នាំ ដែលផែនដីយើងត្រូវធ្វើដំណើរជុំវិញព្រះអាទិត្យ បានមួយជុំ៕