ក្រោយរឿងនេះចេញផ្សាយមិនបានប៉ុន្មានខែផង ឥឡូវនេះកំពុងតែដំណើរការផលិតវគ្គ ២​ ទៀត

សហរដ្ឋអាមេរិក៖ រឿង Sonic:The Hedgehog ដែលបានចេញផ្សាយប៉ុន្មានខែកន្លងនេះ ឥឡូវនេះកំពុងដំណើរការ Sonic the Hedgehog 2 ហើយ។ ក្រុមហ៊ុនផលិតកម្មខ្សែភាពយន្ត Paramount Pictures និង Sega បានប្រកាសនៅសហរដ្ឋអាមេរិកកាលពីថ្ងៃព្រហស្បតិ៍កន្លងទៅនេះថា ពួកគេបានដាក់ដំណើរការរឿងខ្សែភាពយន្ត Sonic the Hedgehog ថ្មីសម្រាប់រដូវកាលថ្មីខាងមុខនេះ ដែលបច្ចុប្បន្នវាកំពុងតែស្ថិតនៅក្នុងដំណើរការផលិតហើយ។

ខ្សែភាពយន្តរឿង Sonic the Hedgehog 2 នឹងបង្កើតឡើងវិញដោយអ្នកដឹកនាំរឿងលោក Jeff Fowler និងសមាជិកក្រុមរបស់គាត់ ដែលការផលិតនេះផងដែរ គឺត្រូវបាននិពន្ធដោយ Pat Casey និង Josh Miller (អ្នកសរសេររឿងបែបគំនូរជីវចល Golan the Insatiable) ជាមួយនឹងសាច់រឿងថ្មី តួអង្គថ្មី និងចំណីអារម្មណ៍ប្លែកមួយបែបទៀតក្នុងការទស្សនារឿងនេះ។

បន្ថែមលើសពីនេះទៅទៀត ក៏មានការចូលរួមពីផលិតករជាច្រើនរូបទៀតដូចជាលោក Neal H. Moritz, លោក Toby Ascher និងលោក Toru Nakahara ។ ចំណែកឯផលិតករ លោក Hajime Satomi, លោក Haruki Satomi និងអ្នកដឹកនាំរឿង Deadpool លោក Tim Miller ក៏នឹងមកចូលរួមក្នុងដំណើរការផលិតខ្សែភាពយន្ត  Sonic the Hedgehog 2 នេះផងដែរ៕

ប្រភព៖ gadgets.ndtv.com