ថៃ៖ ខ្សែភាពយន្តភាគថៃរឿង Khao Wan Hai Nou Pen Sailub ឬ My Secret Bride ដែលជារឿងដ៏ល្បីប្រចាំចុងឆ្នាំ២០១៩ ដោយមានការចូលរួមសម្ដែងពីសំណាក់តារាស្រីរាងតូចច្រឡឹង Kao Supassra និងតារាប្រុសរៀមច្បង Great Warinthon នៅពេលនេះ ត្រូវបានស្ថានីយ៍ទូរទស្សន៍ថៃប៉ុស្តិ៍លេខ៣ យកមកចាក់ផ្សាយឡើងវិញ បន្ទាប់ពីរឿងនេះទើបតែបានបញ្ចប់ទៅអស់រយៈពេលត្រឹមតែ៥ខែប៉ុណ្ណោះ។ នេះអាចចាត់ទុកបានថាជារឿងដ៏កម្រមួយ ព្រោះជាទូទៅស្ថានីយ៍ប៉ុស្តិ៍ លេខ៣ កម្រនឹងយករឿងដែលទើបនឹងចាក់ផ្សាយម្ដងរួចហើយ មិនទាន់បានមួយឆ្នាំស្រួលបួលផង មកចាក់ផ្សាយឡើងវិញណាស់។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សមូលហេតុចម្បងដែលរឿងភាគមួយនេះ ត្រូវយកមកចាក់ផ្សាយឡើងវិញយ៉ាងលឿនបែបនេះ ក៏ដោយសារតែបច្ចុប្បន្ន ការផលិតខ្សែភាពយន្តភាគត្រូវបានផ្អាកជាបណ្ដោះអាសន្នសិន ដោយសារ វិបត្តិកូវីដ១៩ ទើបខាងស្ថានីយ៍ទូរទស្សន៍មិនទាន់អាចផលិតរឿងថ្មី យកមកចាក់ផ្សាយទាន់ពេលវេលា។
មិនត្រឹមតែប៉ុណ្ណោះ ដោយសារតែរឿងនេះ ជាប្រភេទរឿងដែលមានគ្រប់រសជាតិ ទាំងកំប្លែង ស៊ើបអង្កេត ស្នេហា រ៉ូមេនទិច លាយជាមួយនឹងឈុតឆាកខ្មោចរន្ធត់ ហើយទស្សនិកជនភាគច្រើនក៏ពេញចិត្តនឹងការសម្ដែងរបស់ Kao ជាគូនឹង Great យ៉ាងខ្លាំង ទើបអ្នកគ្រប់គ្រងកម្មវិធីទូរទស្សន៍របស់ប៉ុស្តិ៍លេខ៣ ឆាប់រួសរាន់យករឿងនេះមកចាក់ផ្សាយ ដោយមិនបង្អង់យូរ។
គួរបញ្ជាក់ផងដែរថា កន្លងមកស្ថានីយ៍ទូរទស្សន៍ប៉ុស្តិ៍បានយកតែរឿងដែលល្បីខ្លាំងបំផុតប៉ុណ្ណោះ មកចាក់ផ្សាយឡើងវិញក្នុងរយៈពេលឆាប់រហ័ស បើចំពោះរឿងផ្សេងវិញ ទាល់តែរយៈពេលជិតមួយឆ្នាំ ឬច្រើនជាងមួយឆ្នាំ ទើបត្រូវបានយកមកចាក់ផ្សាយឡើងវិញ៕
សូមទស្សនារូបភាពខាងក្រោម៖