ភ្នំពេញ៖ ប្រិយមិត្ដអ្នកប្រើប្រាស់បណ្ដាញសង្គម Facebook ភាគច្រើនប្រាកដជាជ្រាបហើយ នៅពេលថ្មីៗនេះមានហ្គេមមួយប្រភេទដែលជា Instant Game ឈ្មោះ «Jumpy Jumpy» និងហ្គេមផ្សេងៗមួយចំនួនទៀត បានកំពុងអុកឡុកអ្នកប្រើប្រាស់បណ្តាញសង្គម Facebook មួយចំនួនធំនៅក្នុងព្រះរាជាណាចក្រកម្ពុជា។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សហ្គេមប្រភេទនេះអាចទាញយករូប Profile របស់គណនី Facebook មកបង្ហាញលើអត្ថបទហ្គេម និងនាំឲ្យមានការចែករំលែកបន្ត ដោយប្រើពាក្យអសីលធម៌លើចំណងជើងអត្ថបទ ដែលធ្វើឱ្យអ្នកប្រើប្រាស់មួយចំនួនមានការយល់ច្រឡំថាបុគ្គលនោះយករូបខ្លួនទៅផុស និងធ្វើឱ្យប៉ះពាល់ដល់កិត្តិយសយ៉ាងធ្ងន់ធ្ងរ។
បើយោងតាមការបញ្ជាក់របស់នាយកដ្ឋានព័ត៌មានវិទ្យា បានឲ្យដឹងថា ហ្គេមនេះបង្កើតឡើងក្នុងគោលបំណងសម្រាប់បងប្អូនដែលមានគណនី Facebook លេងកម្សាន្ត ហើយអ្នកបង្កើតហ្គេមប្រភេទ Instant Game គឺដើម្បីរកប្រាក់ចំណូលតាមរយ:ការទិញ Items ឬបានមកពីការផ្សាយពាណិជ្ជកម្មផ្សេងៗ។
ប្រសិនបងប្អូនអ្នកប្រើប្រាស់បណ្តាញសង្គមជួបនូវបញ្ហាដូចរៀបរាប់ខាងលើ អាចធ្វើការ Report អត្ថបទហ្គេមនេះបាន ដោយអនុវត្តវិធីសាស្ត្រ ដូចខាងក្រោម៖
- នៅផ្នែកខាងស្តាំលើអត្ថបទ ចុចលើសញ្ញា "…"
- ជ្រើសរើសយក "Find Support or Report Post"
- ជ្រើសរើសយក "Spam" -> "Next" -> "Done"
បើអ្នកបានលេងហ្គេមនេះ អាចចូលទៅលុបវាបាន តាមរយ:៖
- ក្នុងគណនី Facebook ជ្រើសរើសយក Settings -> Instant Games
- ធ្វើការ Remove ប្រភេទហ្គេមដូចរៀបរាប់ខាងលើ (ឧទាហរណ៍៖ Jumpy Jumpy ជាដើម)។
អាស្រ័យហេតុនេះ សូមប្រិយមិត្ដអ្នកប្រើប្រាស់បណ្ដាញសង្គម Facebook មេត្ដាបញ្ឈប់ការលេងហ្គេមប្រភេទនេះជាបន្ទាន់ តាមសេចក្ដីប្រកាសរបស់នាយកដ្ឋានព័ត៌មានវិទ្យាដូចបានរៀបរាប់ខាងលើ៕
ប្រភព: នាយកដ្ឋានព័ត៌មានវិទ្យា ក្រសួងមហាផ្ទៃ Department of IT, Ministry of Interior