បែលហ្សុិក៖ ថ្មីៗនេះ ម្ដាយកូនពីរនាក់នៅប្រទេសបែលហ្សុិក បានសាងភាពភ្ញាក់ផ្អើលមួយ តាមរយៈគំនិតច្នៃប្រឌិត ដោយយកក្រដាសឡាំងធ្វើជាកូនរថយន្ដ បន្ទាប់ពីដឹងថា ក្រុមហ៊ុនលក់ប៊ឺហ្គឺរ McDonald បម្រើសាវាកម្មសម្រាប់អតិថិជនណា ដែលបើករថយន្ដមកទិញប៉ុណ្ណោះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សពាក់ព័ន្ធទៅនឹងគំនិតច្នៃប្រឌិតនេះ អ្នកស្រី Nathalie Moermans ជាម្ដាយ បានប្រាប់កាសែតក្នុងស្រុកមួយថា ដំបូងឡើយ កូនស្រីវ័យ១៦ឆ្នាំរបស់អ្នកស្រី ចង់ទៅហាង McDonald ដើម្បីទិញប៊ឺហ្គឺរ តែដោយសារគ្មានរថយន្ដសម្រាប់ជិះ ទើបមិនអាចទៅបានឡើយ។ ហើយដើម្បីដោះស្រាយបញ្ហាមួយនេះ អ្នកស្រី បានយកក្រដាសឡាំងកែច្នៃចេញជាកូនរថយន្ដ តែកូនស្រីមិនគាំទ្រគំនិតនេះទេ។ ក្រោយពីអ្នកស្រីបានប្រាប់ថា រថយន្ដក្រដាសឡាំងនេះនឹងក្លាយទៅអនុស្សាវរីយ៍ល្អៗនៅថ្ងៃអនាគត ទើបកូនស្រីយល់ព្រមជួយធ្វើ។ មិនយូរប៉ុន្មាន រថយន្ដក្រដាសឡាំងក៏បានចេញជារូបរាង ដោយតុបតែងយ៉ាងប្លែក និងមានស្លាកលេខសរសេរថា «COVID-19»។ បន្ថែមពីនេះទៀត នៅលើផ្នែកខាងក្រោយនៃរថយន្ដបានសរសេរដែរថា «សូមអភ័យទោស! ខ្ញុំចង់ទិញចំណីពីខាង McDonald ប៉ុន្ដែខ្ញុំមិនមានរថយន្ដទេ»។
ក្រោយពីច្នៃរួចរាល់ហើយមក អ្នកស្រី Nathalie និងកូនស្រី បានដាក់ខ្លួនចូលទៅក្នុងរថយន្ដ និងដើរចម្ងាយប្រមាណ៥០០ម៉ែត្រពីផ្ទះ ទៅកាន់ហាង McDonald។ ហើយអ្នកស្រី ក៏បានយករូបភាពក្នុងថ្ងៃនោះ ទៅបង្ហោះលើបណ្ដាញសង្គមហ្វ៊េសប៊ុក ដោយទទួលបានការចាប់អារម្មណ៍ និងមានអ្នកស៊ែរជាច្រើនផងដែរ។
គួរឲ្យដឹងដែរថា ហាង McDonald ក្នុងប្រទេសបែលហ្សុិក មិនបើកដំណើរការសម្រាប់ឲ្យអតិថិជនចូលបរិភោគក្នុងហាងឡើយ ដើម្បីទប់ស្កាត់ការរីករាលដាលនៃជំងឺកូវីដ១៩។ តែហាងនឹងនៅតែផ្ដល់សេវាកម្មជូនអតិថិជនណា ដែលបើករថយន្ដមកទិញ និងខ្ចប់យកទៅបរិភោគនៅផ្ទះ៕
សូមទស្សនារូបភាពខាងក្រោម៖