ទារកក្នុងផ្ទៃ ធ្វើដៃពីរជាសញ្ញាសន្ដិភាព កុំឲ្យម្ដាយភ័យព្រួយអំពីស្ថានភាពវីរុសកូវីដ-១៩

ជប៉ុន៖ ជាការពិត សព្វថ្ងៃនេះ នៅពេលដែលយើងបើកទូរទស្សន៍ឬចូលទៅកាន់គេហទំព័រប្រព័ន្ធផ្សព្វផ្សាយផ្សេងៗ យើងប្រាកដជាឃើញអ្វីមួយដែលទាក់ទងនឹងវីរុសរាតត្បាតកូវីដ-១៩ជានិច្ច។ ហើយព័ត៌មានដែលទាក់ទងនឹងចំនួនអ្នកស្លាប់ដោយសារវីរុសកូវីដ-១៩ បានធ្វើឲ្យប្រជាជនទូទាំងពិភពលោក មានការព្រួយបារម្ភយ៉ាងខ្លាំង ជាពិសេសមនុស្សចាស់ និងស្ត្រីមានផ្ទៃពោះផ្ទាល់តែម្ដង។

ជាក់ស្ដែង ស្ត្រីជនជាតិជប៉ុនម្នាក់ឈ្មោះថា Madoko ពរពោះកូនចំនួន៧ខែហើយ កើតទុក្ខជាខ្លាំង បន្ទាប់ពីតារាកំប្លែងមួយរូបដ៏ល្បីល្បាញដែលនាងចូលចិត្ត គឺលោក Ken Shimura បានទទួលមរណភាពដោយសារវីរុសកូវីដ-១៩។ ទន្ទឹមនឹងនេះដែរ បានធ្វើឲ្យនាងសម្រាកមិនសូវស្រួល និងព្រួយបារម្ភអំពីស្ថានភាពទាំងមូលនៃវីរុសនេះ។

យ៉ាងណាមិញ កាលពីថ្មីៗនេះ នាង Madoko បានទៅពិនិត្យផ្ទៃពោះ ហើយនៅពេលដែលស្កេនអ៊ុលត្រាសោន ក៏ស្រាប់តែឃើញ កូនក្នុងផ្ទៃធ្វើដៃពីរ ជាសញ្ញាសន្ដិភាព ហាក់បីដូចជាចង់ប្រាប់នាងថា អ្វីៗនឹងល្អប្រសើរ និងបញ្ឈប់ការព្រួយបារម្ភទៀតទៅអីចឹង។

បើយោងតាមនាយកដ្ឋានសុខាភិបាលអូស្រ្តាលីភាគខាងលិច បានឲ្យដឹងថា ទារកនៅក្នុងផ្ទៃ អាចមានអារម្មណ៍គ្រប់យ៉ាងដែលស្ត្រីជាម្តាយបានជួបប្រទះ រួមទាំងសំឡេងនៅក្នុងបរិយាកាសខ្យល់ដែលដកដង្ហើម អាហារដែលញ៉ាំ និងអារម្មណ៍ដែលមានជាដើម៕

សូមទស្សនារូបភាពខាងក្រោម៖