រ៉ូម៖ កាលពីថ្ងៃសុក្រម្សិលមិញនេះ ទីភ្នាក់ងារការពារជនស៊ីវិលរបស់អុីតាលីបានរាយការណ៍ថា គិតត្រឹមរយៈពេល ២៤ ម៉ោងចុងក្រោយ មានមនុស្សយ៉ាងហោចណាស់ ៩១៩ នាក់ បានស្លាប់បាត់បង់ជីវិតដោយសារវីរុសកូវីដ-១៩ ដែលនេះជាចំនួនសរុបប្រចាំថ្ងៃខ្ពស់បំផុត ចាប់តាំងពីការផ្ទុះឡើងដំបូងនៅថ្ងៃទី ២១ ខែ កុម្ភៈ។ នេះបើយោងតាមការចុះផ្សាយរបស់សារព័ត៌មានអន្ដរជាតិ MSN ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សតួលេខថ្មី នៅថ្ងៃសុក្រម្សិលមិញនេះ ជាចំនួនដ៏ច្រើនបំផុត និងមិនធ្លាប់មានពីមុនមក បើធៀបនឹងចំនួនអ្នកស្លាប់ ៧១២ នាក់នៅថ្ងៃព្រហស្បតិ៍, ៦៨៣ នាក់នៅថ្ងៃពុធ, ៧៤៣ នាក់នៅថ្ងៃអង្គារ និង ៦០២ នាក់នៅថ្ងៃចន្ទដើមសប្ដាហ៍។ ជាមួយគ្នានេះដែរ នៅតំបន់ដែលផ្ទុះខ្លាំងជាងគេ Lombardy ភាគខាងជើងប្រទេសអុីតាលីឯណោះវិញ ក៏បានរាយការណ៍ពីកំណើនឡើងយ៉ាងខ្លាំងផងដែរ ហើយបច្ចុប្បន្ន តំបន់នេះមានចំនួនអ្នកស្លាប់សរុប ៥,៤០២ នាក់ និងករណីឆ្លងមាន ៣៧,២៩៨ ករណី បើធៀបនឹងថ្ងៃព្រហស្បតិ៍ ដែលមានចំនួនអ្នកស្លាប់ត្រឹមតែ ៤,៨៦១ នាក់ និងករណីឆ្លងមាន ៣៤,៨៨៩ ករណី។
សូមបញ្ជាក់ថា ចំនួនអ្នកស្លាប់សរុបនៅថ្ងៃសុក្រទាំង ៩១៩ នាក់នេះ បានរាប់បញ្ជូលចំនួនអ្នកស្លាប់ ៥០ នាក់ផ្សេងទៀតមកពីតំបន់ Piedmont កាលពីថ្ងៃព្រហស្បតិ៍ ដែលបញ្ជូនទិន្នន័យមកដល់យឺតពេល។
គួរឲ្យដឹងដែរថា អុីតាលី ជាប្រទេសដែលមានចំនួនមនុស្សស្លាប់ដោយសារវីរុសកូវីដ-១៩ ច្រើនបំផុតនៅលើពិភពលោក រហូតទៅដល់ ៩,១៣៤ នាក់ ខណៈចំនួនអ្នកឆ្លងសរុបបានកើនដល់ ៨៦,៤៩៨ នាក់ តាមពីក្រោយសហរដ្ឋអាមេរិកដែលមានចំនួន ១០៥,០១២ នាក់។ នេះបើយោងទៅតាមតារាងទិន្នន័យ Tracking Coronavirus របស់ BNO News គិតត្រឹមព្រឹកថ្ងៃទី ២៨ ខែ មីនា ឆ្នាំ ២០២០ ៕