បរទេស៖ ថៃកំពុងប្រឈមជាមួយជំងឺកូវីត-១៩ ដ៏កាចសាហាវ ដែលមានប្រភពមកពីប្រទេសអ៊ីតាលី ហើយវាមានគ្រោះថ្នាក់ជាងជំងឺកូវីត-១៩ នៅទីក្រុងវូហានប្រទេសចិនទៅទៀត។ នេះបើយោងតាមការផ្សាយរបស់ទីភ្នាក់ងារសារព័ត៌មាន Thaipbsworld ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
លោកវេជ្ជបណ្ឌិត Manoon Leechawengwong បានឱ្យដឹងថា ជនបរទេសម្នាក់ដែលធ្វើដំណើរមកប្រទេសអ៊ីតាលី បានទៅមើលការប្រកួតប្រដាល់នៅពហុកីឡដ្ឋាន Lumpini Boxing Stadium កាលពីថ្ងៃទី ៦ ខែមីនា ហើយគាត់បានក្លាយជាអ្នកចម្លងរាលដាលខ្លាំងបំផុត ដោយសារអ្នកដែលទៅមើលប្រដាល់ជាង ៥០ នាក់ផ្សេងទៀតបានឆ្លងជំងឺនេះ ហើយបានបន្តចម្លងទៅមនុស្សជាច្រើនទៀតនៅតាមខេត្តផ្សេងៗ។
លោកវេជ្ជបណ្ឌិត Manoon Leechawengwong អះអាងថា ជំងឺកូវីត-១៩ ដែលមាននៅលើខ្លួនអ្នកជំងឺអ៊ីតាលី គឺជាប្រភេទជំងឺដ៏កាចសាហាវនិងឆ្លងលឿន ហើយជាពិសេសវាអាចទៅបំផ្លាញប្រព័ន្ធផ្លូវដង្ហើមរបស់អ្នកជំងឺបានយ៉ាងឆាប់រហ័សទៀតផង។ តួយ៉ាង ករណីឆ្លងនៅប្រទេសអ៊ីតាលីដំបូងត្រូវបានគេរកឃើញកាលពីចុងខែមករា ប៉ុន្តែជំងឺនេះបានឆ្លងរីករាលដាលលឿនបំផុត ហើយរហូតមកដល់ពេលនេះប្រទេសអ៊ីតាលីបានក្លាយជាប្រទេសទី ១ ដែលមានអ្នកស្លាប់ដោយសារជំងឺកូវីត-១៩ច្រើនគេបំផុតនៅលើពិភពលោក។
លោកវេជ្ជបណ្ឌិត Manoon បានព្យាករណ៍ថា ចំនួនអ្នកឆ្លងជំងឺកូវីត-១៩ នៅក្នុងប្រទេសថៃនឹងបន្តកើនឡើង ហើយអ្នកជំងឺត្រូវតែព្យាបាលដោយប្រើថ្នាំពីប្រទេសជប៉ុនដែលមានឈ្មោះថា Avigan ឬ Favipiravir និងថ្នាំដទៃទៀតដូចជា hydroxychloroquine បើមិនដូច្នេះទេ ចំនួនអ្នកស្លាប់នឹងកើនឡើងបន្ថែមទៀត៕
Bong I.T