ពេទ្យស្រី ជនជាតិអុីតាលី សម្រេចចិត្តសម្លាប់ខ្លួន បន្ទាប់ពីតេស្ដវិជ្ជមានវីរុសកូវីដ-១៩ ដោយខ្លាចថាខ្លួននឹងចម្លងទៅអ្នកដទៃទៀត

អុីតាលី៖ គិលានុបដ្ឋាយិកាជនជាតិអុីតាលីម្នាក់ ឈ្មោះថា Deniela Trezzi វ័យ៣៤ បានសម្រេចចិត្តសម្លាប់ខ្លួន បន្ទាប់ពីតេស្ដវិជ្ជមានវីរុសកូវីដ-១៩ ដោយខ្លាចថាខ្លួននឹងចម្លងវីរុសនេះទៅកាន់អ្នកដទៃទៀត។

គិលានុបដ្ឋាយិការូបនេះ កំពុងធ្វើការនៅជួរមុខនៅឯមន្ទីរពេទ្យមួយក្នុងទីក្រុង Lombardy ដែលជាតំបន់រងផលប៉ះពាល់ដ៏អាក្រក់បំផុតរបស់ប្រទេសអុីតាលី។

អ្នកចាត់ការទូទៅនៃមន្ទីរពេទ្យ San Gerardo លោក Mario Alparone បានឲ្យដឹងថា គិលានុបដ្ឋាយិកា Daniela បានដេកឈឺនៅផ្ទះតាំងពីថ្ងៃទី១០ ខែមីនាមកម៉្លេះ ហើយនាងមិនបានស្ថិតនៅក្រោមការឃ្លាំមើលឡើយ។ 

កាលពីយប់ថ្ងៃទី២៤ ខែមីនាកន្លងទៅនេះ នៅក្នុងសេចក្ដីថ្លែងការណ៍មួយ សហព័ន្ធជាតិគិលានុប្បដ្ឋាយិកានៃប្រទេសអុីតាលី បានសម្ដែងនូវការសោកស្ដាយ និងឈឺចាប់ជាខ្លាំង ចំពោះមរណភាពរបស់ គិលានុបដ្ឋាយិកា Daniela។ សហព័ន្ធក៏បានឲ្យដឹងដែរថា គិលានុបដ្ឋាយិកា ប្រឈមនឹងភាពតានតឹងយ៉ាងខ្លាំង ព្រោះតែនាងបារម្ភថាខ្លួននឹងចម្លងវីរុស ខណៈពេលកំពុងព្យាយាមគ្រប់គ្រងវិបត្តិ។

ហើយវាបានកើតឡើង នៅពេលដែលចំនួនអ្នកស្លាប់នៅប្រទេសអុីតាលីបានកើនឡើងជាថ្មីម្តងទៀតកាលពីថ្ងៃទី២៤ ខែមីនានេះ ជាមួយនឹងចំនួនអ្នកស្លាប់ថ្មីរាប់រយនាក់ក្នុងរយៈពេលមួយថ្ងៃប៉ុណ្ណោះ ដែលធ្វើឲ្យក្ដីសង្ឃឹមរបស់បុគ្គលិកពេទ្យ វិលទៅរកភាពតានតឹងវិញ។  

យ៉ាងណាមិញ ជុំវិញករណីមរណភាពខាងលើនេះ ខាងអាជ្ញាធរក៏កំពុងធ្វើការស៊ើបអង្កេតបន្ថែមផងដែរ៕

សូមទស្សនារូបភាពខាងក្រោម៖

• រូបភាព