ថ្មីៗនេះ ប្រធានយុវជនសំរាមលោក សាន ដារ៉ាវីត បានបង្ហោះនៅលើហ្វេសប៊ុកផ្ទាល់ខ្លួនរបស់លោកអំពីការទៅដល់គោលដៅនៃដំណើរថ្មើរជើងរយៈពេល៨ថ្ងៃកន្លះ ពីតំបន់បឹងត្របែក ក្រុងភ្នំពេញរហូតដល់ដីខេត្តសៀមរាបដែលមានចម្ងាយរហូតដល់៣៣៣គីឡូម៉ែត្រ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបន្ទាប់ពីនោះគេឃើញមានការបញ្ចេញយោបល់ (comment)ពីសំណាក់អ្នកអានខ្លះទៅលើការបង្ហោះ របស់លោកដោយលើកឡើងថា ដំណើរថ្មើរជើងរបស់ក្រុមលោកបែបនេះគឺខ្ជះខ្ជាយពេលវេលាណាស់ ហើយអ្នកមួយចំនួនបានចោទជាសំណួរទៅកាន់លោកថា «តើធ្វើបែបនេះបានអីមកវិញ?»
តបនឹងមតិទាំងនោះ ប្រធានយុវជនសំរាម លោកសាន ដារ៉ាវីត បានប្រាប់ Khmerload ថា រឿងថ្មើរជើង៣៣៣គីឡូម៉ែត្រ រយៈពេល៨ថ្ងៃកន្លះ ពីភ្នំពេញ-សៀមរាបមិនពាក់ព័ន្ធនឹងការខ្ជះខ្ជាយពេលវេលាឡើយ តែទាក់ទងនឹងអត្ថន័យជីវិត។
លោកថា៖ «មែនទែនទៅ រឿងដើរនេះ វាមិនពាក់ព័ន្ធនឹងការខ្ជះខ្ជាយពេលវេលាទេ តែវាទាក់ទងនឹងអត្ថន័យជីវិត។ មួយថ្ងៃៗ យើងម្នាក់ៗចំណាយពេលវេលាច្រើនសន្ធឹកលើសកម្មភាពផ្សេងៗ ទាំងអស់ហ្នឹង គ្រប់គ្នាបានចំណាយពេលវេលារបស់ខ្លួន។ ខ្ញុំក៏ដូចគ្នា បើធ្វើអីដែលចូលចិត្ត ខ្ញុំគិតថាខ្លួនឯងមិនបានខ្ជះខ្ជាយពេលទេ តែខ្ញុំបានធ្វើអីម្យ៉ាងដែលជារសជាតិថ្មី។»
ហាក់បង្ហាញពីជំហរសុទិដ្ឋិនិយមលើដំណើរផ្សងព្រេងរបស់ខ្លួន ប្រធានយុវជនសំរាមរូបនេះបានបន្ថែមថា៖ « យើងបានធ្វើវា។ យើងមិនមែនកើតមក ហើយធ្វើគ្រប់យ៉ាងដើម្បីលុយតែម្យ៉ាងនោះទេ។ យ៉ាងហោចណាស់ ខ្ញុំអាចប្រាប់កូនខ្ញុំថា ឪពុកធ្លាប់បានដើរពីភ្នំពេញដល់សៀមរាប។ ហើយខ្ញុំ និងក្រុមគ្រាន់តែចង់ភ្លក់អ្វីដែលថ្មី ក្រោយពីដើរ ៣៣៣គីឡូដី យើងរឹងមាំច្រើនជាងមុនទាំងកម្លាំងជើង និងសុខភាពផ្លូវចិត្ត»។
អ្នកភ្នំពេញរូបនេះបន្តថា៖ «ខ្ញុំរៀនបានច្រើនពីដំណើរទាំងនោះ។ យើងដើរកណ្តាលថ្ងៃក្តៅ។ យើងរើសសំរាមតាមផ្លូវ។ យើងគេងនៅតាមវត្ត តាមសាលារៀន។ យើងវេចអង្ករ និងម្ហូបក្រៀមតាមខ្លួន យើងរៀនបាននូវភាពតស៊ូ ព្រោះមនុស្ស មួយចំនួនគ្រាន់តែឮថាដើររាប់គីឡូដី គេសុំចុះចាញ់បាត់ទៅហើយ។»
យុវជនវ័យ៣០ឆ្នាំរូបនេះបង្ហើបថា ដំណើរដើមទងដែលជំរុញឲ្យខ្លួនសម្រេចដើរតាំងពីបឹងត្របែកដល់សៀមរាបគឺព្រោះតែ ខ្លួនចង់រំឭកពីខួបមួយឆ្នាំនៃការកកើតយុវជនសំរាម។ ហើយអ្នកដែលចូលរួមដើរពីភ្នំពេញដល់សៀមរាប គឺមានយុវជនក្នុងក្រុម១២នាក់ យុជនមកពីក្រៅ៣នាក់ និងកុមារាពីតំបន់បឹងត្របែកម្នាក់។
គួររំឮកថា យុវជនសាន ដារ៉ាវីត កាលពីឆ្នាំមុនបានបង្កើតសកម្មភាពមួយដែលកៀរគរយុវជនដូចគ្នាឲ្យចូលរួមប្រមូលសំរាមនៅតំបន់លូបឹងត្របែក។ កាលនោះ គេនៅចាំបានថា ក្រុមរបស់លោកក៏ទទួលបាននូវការឧបត្ថម្ភពីសប្បុរសជនក្នុងន័យលើកទឹកចិត្តផងដែរ៕