ភ្នំពេញ៖ សៀវភៅ «ស្រ្តីដែកថែប» ដែលមកដល់ពេលនេះ ត្រូវបោះពុម្ពផ្សាយរហូតដល់ ៤លើក ក្នុងចំនួន​ប្រហែល​ជិត១ម៉ឺនក្បាល នៅតែ​បន្តទទួលបានការគាំទ្រពីប្រិយមិត្តអ្នកអាន ពិសេសគឺ នារីៗ។ លោក ឈុំ សីហា ដែលជាសហស្ថាបនិក​ គ្រឹះស្ថានបោះពុម្ពផ្សាយហាតប៊ុក និងជាអ្នករៀបរៀង បានបញ្ជាក់​ពីរឿងរ៉ាវមួយចំនួន ពិសេស​គឺ​មូលហេតុ​ដែលលោកសម្រេចចេញបង្កើតសៀវភៅមួយក្បាលនេះឡើង។

លោកបញ្ជាក់អំពីសៀវភៅដែលមានកម្រាស់ ២១៧ ទំព័រ នេះថា លោកបានចាប់ផ្តើមស្រាវជ្រាវ និង​ចង​ក្រង​​​​​​នៅពាក់កណ្តាលឆ្នាំ២០១២។ ចំណាយពេលរហូតដល់ជាង២ឆ្នាំ រហូតដល់ចុងឆ្នាំ២០១៤ ទើប​លោក​​​បាន​បោះពុម្ពសៀវភៅនេះឡើង។ ចំពោះសំណួរថា “ហេតុអ្វីត្រូវ​រៀបរៀងសៀវភៅនេះឡើង?” លោក​​បា​ន​បញ្ជាក់ថាគឺ «ដើម្បីលើកទឹកចិត្តស្រ្តីខ្មែរ»

ដំបូងឡើយមានស្រ្តីពីររូប ដែលលើកទឹកចិត្តគាត់ឱ្យសៀវភៅនេះ ដោយម្នាក់គឺលោកស្រី អ៊ុងសាន ស៊ូជី និងលោកស្រី ហ៊ីលឡារី គ្លីនតុន។ មិនមែនពួកគាត់ទាំងពីរលើកទឹកចិត្តលោក ឈុំ សីហា ដោយផ្ទាល់​នោះទេ ប៉ុន្តែតាមរយៈដំណើរជីវិតរបស់ពួកគាត់។

ប្រសាសន៍របស់លោក ឈុំ សីហា

ដោយសារជីវប្រវត្តិស្រ្តីទាំងពីរ មិនអាចគ្រប់ចំនួនទំព័រដែលលោកត្រូវការ ទើបលោកបន្តស្រាវជ្រាវអំពីជីវប្រវត្តិរបស់ស្រ្តីពូកែៗជាច្រើនទៀត រហូតដល់១៤រូប ដែលមានសញ្ជាតិផ្សេងគ្នា និងចេញ​ពី​មជ្ឈ​ដ្ឋាន​ផ្សេងៗគ្នា ពិសេសជា អ្នកនយោបាយ និង​សកម្មជនសង្គមជាដើម។ ថ្មីៗនេះក្នុងការ​បោះពុម្ព​លើក​ទី៤ លោកបានបន្ថែមប្រវត្តិរបស់លោកស្រីប្រធានាធិបតីកោះតៃវ៉ាន់មួយរូប​ថែម​ទៀត គ្រប់ចំនួន១៥​រូប។

លោកបញ្ជាក់ថា លោកមានក្តីសុបិនមួយ «ចង់ឃើញមេដឹកនាំ​ប្រទេស​កម្ពុជា ជាស្រ្តី» ដ្បិត​ប្រទេស​ជាច្រើនក្នុងពិភពលោក ពិសេសប្រទេសក្នុងតំបន់អាស៊ាន មាន​មេដឹកនាំ​រដ្ឋា​ភិបាល​ជាស្រ្តីដែរ។ ប្រទេសភូមា ថៃ ឥណ្ឌូនេស៊ី ហ្វីលីពីនជាដើម សុទ្ធតែធ្លាប់មានមេដឹកនាំ​ជាស្រ្តី ដូចនេះស្រ្តីកម្ពុជាក៏អាចក្លាយជាមេដឹកនាំប្រទេសបានដែរ។ លោកបន្តថា លោកមានជំនឿថា «ស្រ្តីកម្ពុជាអាចធ្វើបាន»

ពាក់ព័ន្ធនឹងចម្ងល់ថា ហេតុអ្វីត្រូវដាក់ចំណងជើងសៀវភៅនេះថា «ស្រ្តីដែកថែប» លោកបានបញ្ជាក់ថា ដោយសារលោក​មើលឃើញពីភាព​អង់អាចក្លាហាន ការតស៊ូ ការលះបង់ ពិសេសហ៊ានលះបង់​រហូត​ដល់​ជីវិត ដើម្បីបុព្វហេតុ​របស់​ប្រទេស​ជាតិខ្លួន ពោលគឺរឹងមាំដូចដែកថែប។

សូមបញ្ជាក់ថា លោក ឈុំ សីហា គឺជា​អ្នករៀបរៀងសៀវភៅមួយរូប និងជាសហស្ថាបនិកគ្រឹះស្ថានបោះ​ពុម្ពផ្សាយ​ហាតប៊ុក។ លោកបានសរសេរសៀវភៅជាច្រើនក្បាល ហើយបងប្អូនអាចរកសៀវភៅទាំង​នេះ​បាន​នៅ​តាមបណ្ណាគារធំៗនៅភ្នំពេញ និងតាមបណ្តាខេត្ត។ លោកអ្នកក៏អាច​ចូលទៅកាន់​ទំព័​រហ្វេ​ស​ប៊ុក​ផ្លូវការ heartbookcambodia ឬគេហទំព័រ www.heartbookcambodia.com ដើម្បីទទួលបានព័ត៌មានបន្ថែម៕

លោក ឈុំ សីហា អ្នករៀបរៀងសៀវភៅ ស្រ្តីដែកថែប និងជាសហស្ថាបនិក គ្រឹះស្ថានបោះពុម្ពផ្សាយហាតប៊ុក
ប្រិយមិត្តអ្នកអានម្នាក់ កំពុងអានសៀវភៅ ស្រ្តីដែកថែប

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ