អាជ្ញាធរវៀតណាម ​ជំរុញ​ឱ្យពលរដ្ឋខ្លួនកុំចាកចេញពី​កូរ៉េខាងត្បូង ស្របពេលដែលវីរុសកូរ៉ូណាកំពុងរាលដាលខ្លាំង

វៀតណាម៖ ក្រសួងការបរទេសបានប្រកាសថា ប្រជាជនវៀតណាមដែលកំពុងរស់នៅក្នុងប្រទេសកូរ៉េខាងត្បូងគួរកុំចាកចេញពីប្រទេសនេះប្រសិនបើមិនចាំបាច់ ព្រោះធ្វើដូច្នេះវា​អាចកាត់បន្ថយការ​ចម្លងវីរុសកូរ៉ូណានេះទៅកាន់ប្រទេសផ្សេងៗទៀត។

នៅក្នុងសេចក្តីជូនដំណឹងដែលបានផ្ញើទៅសហគមន៍វៀតណាមនៅកូរ៉េខាងត្បូងកាលពីល្ងាចថ្ងៃទី ២៤ ខែកុម្ភៈ ក្រសួងបានណែនាំឱ្យប្រជាជន​វៀតណាមត្រូវរក្សាភាពស្ងៀមស្ងាត់ ហើយត្រូវជៀសវាងការធ្វើដំណើរ​ផ្សេងៗដោយស្របតាមការណែនាំពីអាជ្ញាធរកូរ៉េខាងត្បូង ដើម្បីការពារខ្លួនពីវីរុសដ៏កាចសាហាវនេះ។

អាជ្ញាធររបស់ប្រទេសកូរ៉េខាងត្បូងបានប្រកាសថា ចាប់​ពីថ្ងៃទី ២៤ ខែកុម្ភះ រាល់អ្នកធ្វើដំណើរចូលមកពីតំបន់ដែលរងការរាតត្បាតរួមមានទីក្រុង Daegu និងខេត្ត Gyeongsangbuk របស់ប្រទេសកូរ៉េខាងត្បូង នឹងត្រូវ​រៀបចំឱ្យនៅដាច់ដោយឡែករយៈពេល ១៤ ថ្ងៃ។

អាជ្ញាធររបស់ប្រទេសកូរ៉េខាងត្បូងក៏បានបញ្ជាក់ដែរថា ប្រជាជនវៀតណាមប្រមាណ ២០ ម៉ឺននាក់ដែលកំពុងរស់នៅនឹងធ្វើការនៅ​ប្រទេសកូរ៉េខាងត្បូង ដោយក្នុងនោះមាន​ ៨២៨៥ នាក់រស់នៅក្នុងទីក្រុង Daegu ពួកគេនៅតែមានសុវត្ថិភាព បើទោះបី​មានការផ្ទុះឡើងនៃវីរុសកូរ៉ូណាក្នុងប្រទេសក៏ដោយ៕