យោងតាមសារព័ត៌មាន Jeunes Footeux ក្លឹបនៅ Premier League ចំនួន ៣ ចាប់អារម្មណ៍ខ្សែប្រយុទ្ធវ័យ ២០ឆ្នាំ របស់ក្លឹប Gent នៅលីគកំពូលប៊ែលហ្សិក មួយរូប គឺកីឡាករ Jonathan David ជាគោលដៅផ្ទេរសំខាន់នារដូវកាលក្រោយ។
យ៉ាងណាមិនមែនមានតែក្លឹប ៣ នៅអង់គ្លេសនោះទេ ដែលចាប់អារម្មណ៍ គឺមានក្លឹប ២ នៅ Serie A រួមមានក្លឹប Lazio និងក្លឹប Napoli ក៏ចង់បានខ្សែប្រយុទ្ធជម្រើសជាតិកាណាដាខាងលើដូចគ្នា ស្របពេល RB Leipzig របស់លីគកំពូលអាល្លឺម៉ង់ក៏បើកភ្លើងខៀវចូលរួមប្រជែងផងដែរ។
ក្រោយបង្ហាញខ្លួនសរុប ៣៥ប្រកួតឱ្យ KAA Gent ក្នុងរដូវកាលនេះ ជាមួយគ្រាប់បាល់ ១៩គ្រាប់ និងបញ្ជូនបាល់ ១០គ្រាប់ រូបគេបានកើនតម្លៃខ្លួនដល់ ១៨លានផោន (ប្រមាណ ២៣លានដុល្លារ)។
សម្រាប់ក្រុមជម្រើសជាតិវិញ កីឡាករដែលកើតនៅសហរដ្ឋអាមេរិក តែលេងឱ្យជម្រើសជាតិកាណាដា បានបង្ហាញខ្លួនក្នុងជម្រើសជាតិកាណាដាឈុតធំចំនួន ១២លើក ដោយរកបាន ១១គ្រាប់ និងបញ្ជូនបាល់ឱ្យមិត្តរួមក្រុមបានចំនួន ៥លើកផងដែរ៕