ខណៈនេះ ថ្នាក់ដឹកនាំគ្រប់ជាន់ថ្នាក់ និងគ្រូពេទ្យជាច្រើន កំពុងរង់ចាំទទួលនាវា MS Westerdam នៅកំពង់ផែកំពង់សោម!

ខេត្តព្រះសីហនុ៖ កាលពីម្សិលមិញនេះ ប្រមុខរាជរដ្ឋាភិបាលកម្ពុជា បានប្រកាសអនុញ្ញាតិឲ្យ នាវាទេសចរណ៍លំដាប់អន្តរជាតិមួយគ្រឿងរបស់សហរដ្ឋអាមេរិកឈ្មោះ MS Westerdam ចូលចតនៅឯកំពង់ផែ ក្រុងព្រះសីហនុ ក្រោយពីនាវាមួយនេះ ត្រូវបានប្រទេស និងកោះសរុបចំនួន៦ បដិសេធមិនឲ្យចូលថត ដោយសារតែភ័យខ្លាចអ្នកដំណើរនៅលើនាវានេះ មានផ្ទុកវីរុសកូរ៉ូណាថ្មី។

ប៉ុន្តែមិនថាយ៉ាងណា នាវាមួយនេះក៏ត្រូវបានអនុញ្ញាតិឲ្យចូលនៅកម្ពុជា បន្ទាប់ពីមានការធានាច្បាស់លាស់ ពីអ្នកគ្រប់គ្រងនាវាទេសចរណ៍ MS Westerdam ជូនដល់រាជរដ្ឋាភិបាលកម្ពុជាថា មនុស្សទាំងអស់នៅលើនាវានេះមិនមានអ្នកណាម្នាក់ ផ្ទុកវិរុសកូរ៉ូណាថ្មី ឬCovid-19 នោះឡើយ។

ជាក់ស្តែង នាព្រឹកថ្ងៃទី១៣ ខែកុម្ភៈនេះផងដែរ យើងសង្កេតឃើញថា មានថ្នាក់ដឹកនាំក្រសួងស្ថាបន័ថ្នាក់ជាតិនិងថ្នាក់ដឹកនាំខេត្តព្រះសីហនុ ព្រមទាំងមន្ត្រីជំនាញពាក់ពន្ធ័ កំពុងមានវត្តមាននៅកំពង់ផែក្រុងព្រះសីហនុ រង់ចាំទទួលអ្នកទេសចរណ៍អន្តរជាតិដែលមកតាមនាវាទេសចរណ៍ឈ្មោះ MS Westerdam ចូលចតកំពង់ផែបន្តិចទៀតនេះ។

ជាមួយគ្នានេះផងដែរ មន្រ្តីអះអាងថា ផ្នែកពេទ្យក៏បានចុះទៅយកសំណាក នៅលើនាវាទេសចរណ៍ MS Westerdam ដើម្បីត្រួតពិនិត្យយ៉ាងយកចិត្តទុកដាក់ នៅលើនាវាជាមុនសិន មុននឹងអនុញ្ញាតអោយមនុស្សនៅលើនាវា ឡើងមកលើផែ ដើម្បីធានាថា មិនមានអ្នកណាម្នាក់ឆ្លងមេរោគ៕

ប្រភពពី៖ Huy Bunleng News