អង្គការតម្លាភាពអន្តរជាតិ(Transparency International ឬTI) នាថ្ងៃទី២៣ មករា ២០២០នេះ បានផ្សព្វផ្សាយជាសាធារណៈនូវរបាយការណ៍មួយស្តីពីកម្រិតអំពើពុករលួយនៅកម្ពុជាថាទទួលបានពិន្ទុ២០លើពិន្ទុអតិបរមា១០០ និងឈរនៅលេខរៀងទី១៦២ ក្នុងចំណាត់ថ្នាក់ជាសកលដែលមានប្រទេស និងដែនដីសរុបចំនួន ១៨០ ដែលត្រូវបានយកមកសិក្សាលើសន្ទស្សន៍នៃការយល់ឃើញពីអំពើពុករលួយនាឆ្នាំ២០១៩ (ពិន្ទុ០មានន័យថាមានអំពើពុករលួយខ្លាំង ចំណែកពិន្ទុ១០០មានន័យថា មានអំពើពុករលួយកាន់តែតិច)។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សតាមរយៈរបាយការណ៍នេះ អង្គការខាងលើបានបញ្ជាក់ថា កម្ពុជាជាប្រទេសដែលមានកម្រិតអំពើពុករលួយខ្លាំងជាងគេនៅអាស៊ីអាគ្នេយ៍។
តបនឹងការផ្សាយរបាយការណ៍នេះ អ្នកនាំពាក្យរាជរដ្ឋាភិបាល លោកផៃ ស៊ីផាន បានប្រាប់ Khmerloadថា របាយការណ៍របស់អង្គការខាងលើមានបំណងមិនសុច្ចរិតមកលើកម្ពុជា។ ហើយថាវាគ្រាន់តែជាទស្សនៈផ្ទាល់របស់អង្គការមួយនោះ ហើយមិនមានមូលដ្ឋានច្បាស់លាស់។ អ្នកនាំពាក្យរូបនេះបន្តថា របាយការណ៍ដែលអាចទុកចិត្តបានគឺមានតែរបាយការណ៍ពីអង្គការសហប្រជាជាតិប៉ុណ្ណោះ។
លោកផៃ ស៊ីផានបន្តថា៖ «របាយការណ៍នោះចង់និយាយថាម៉េចក៏និយាយទៅ វាជាសេរីភាពរបស់គាត់។ រាល់ថ្ងៃយើងមានអង្គភាពប្រឆាំងអំពើពុករលួយ។ របាយការណ៍ដែលត្រឹមត្រូវគេឈរលើពាណិជ្ចកម្ម និងចំណូលពន្ធដារ បើបានខ្ពស់ នោះមិនមានលុយក្រោមតុ ឬលើតុនោះទេ។ អ៊ឹចឹងហើយរឿងការផ្តល់សេវាកម្ម គេកាត់បន្ថយពីហុចនឹងដៃ មកធ្វើតាមប្រព័ន្ធអេឡិចត្រូនិចវិញ។»
បន្ថែមពីនេះ អ្នកនាំពាក្យរដ្ឋាភិបាលខាងលើបានចោទជាសំណួរថា៖ «បើឃើញមានអំពើពុករលួយ ម៉េចមិនប្តឹង? បែរជាមកបំផ្លាញអ្វីដែលគេកំពុងប្រឹងសាងទៅវិញ។ វាគ្រាន់តែជានិន្នាការនយោបាយតែប៉ុណ្ណោះ។ យើងមិនយកចិត្តទុកដាក់លើចំណាត់ថ្នាក់ហ្នឹងទេ។ »
ចំណែកលោកច័ន្ទ សុផល នាយកមជ្ឈមណ្ឌលសិក្សាគោលនយោបាយ សុំមិនធ្វើអត្ថាធិប្បាយអ្វីឡើយចំពោះរបាយការរណ៍របស់អង្គការតម្លាភាព។ លោកថា ដោយសារលោកមិនបានសិក្សាដើម្បីប្រៀបធៀបក្នុងការធ្វើសេចក្តីសន្និដ្ឋាននៅឡើយ។
បើទោះជាបែបនោះក្តី លោកថាកន្លងមកជាការកត់សម្គាល់ របាយការណ៍របស់អង្គការតម្លាភាពអន្តរជាតិ មានការយកទៅប្រើប្រាស់ច្រើនគួរសមដែរ។
លោកច័ន្ទ សុផលថា៖ «របាយការណ៍របស់ TI (Transparency International) មានគេយកទៅប្រើជាអំណះអំណាងច្រើនដែរ ពេលណាមានការបកស្រាយពីកម្រិតអំពើពុករលួយ។»
លោកបន្ថែមថា អង្គការអន្តរជាតិខាងលើតាមដែលលោកដឹង គឺមានការទទួលស្គាល់ និងមានការសម្ភាសន៍ដោយប្រើវិធីសាស្ត្រត្រឹមត្រូវនៅច្រើនប្រទេស មានរបៀបដាក់ពិន្ទុ និងចំណាត់ថ្នាក់ដែលមានការទទួលស្គាល់ ព្រមទាំងត្រូវគេយកទៅប្រើប្រាស់។ តែលោកបញ្ជាក់ថា ខ្លួនមិនមានសមត្ថភាពឆ្លើយតប ថារបាយការណ៍របស់អង្គការខាងលើខុស ឬត្រូវនោះទេ។
គួរបញ្ជាក់ថា ចំពោះទិន្នន័យ និងរបាយការណ៍របស់អង្គការតម្លាភាពអន្តរជាតិ(TI) កាលពីឆ្នាំ២០១៨ កម្ពុជាក៏ទទួលពិន្ទុ២០/១០០ផងដែរ ប៉ុន្តែកាលនោះ ចំណាត់ថ្នាក់ដែលទទួលបានគឺ១៦១ក្នុងចំណោមប្រទេស១៨០។ ហើយបើប្រៀបធៀបគ្នា របាយការណ៍បញ្ជាក់ថា ចំណាត់ថ្នាក់របស់កម្ពុជាទាក់ទិននឹងអំពើពុករលួយនាឆ្នាំ២០១៩នេះកាន់តែធ្លាក់ចុះចំណាត់ថ្នាក់ជាងមុន។ បើទោះជាបែបនេះក្តី ជាការឆ្លើយតបនឹងរបាយការណ៍ទាំងនោះ មន្ត្រីរាជរដ្ឋាភិបាលជាញឹកញាប់បានចេញមុខបដិសេធដោយអះអាងថា ទិន្នន័យដែលលើកឡើង មាននិន្នាការនយោបាយ ជាទិន្នន័យគ្មានមូលដ្ឋាន និងមិនគួរយកចិត្តទុកដាក់ឡើយ៕