វីរុសពីបុរាណជាច្រើនត្រូវបានគេរកឃើញនៅក្នុងផ្ទាំងទឹកកក ដែលមានអាយុកាល១៥,០០០ឆ្នាំ

ចិន៖ នៅឆ្នាំ២០១៥ ក្រុមអ្នកវិទ្យាសាស្ត្រមកពីសហរដ្ឋអាមេរិកនិងចិន បានធ្វើដំណើរទៅកាន់តំបន់ទីបេ ដើម្បីប្រមូលសំណាកទឹកកក ដែលមានអាយុចំណាស់ជាងគេនៅលើផែនដី។ កាលពីដើមខែនេះ ពួកគេបានបោះពុម្ពផ្សាយពីរបកគំហើញរបស់ពួកគេ ដែលបានរកឃើញក្រុមវីរុសថ្មីចំនួន២៨ នៅក្នុងទឹកកកដែលមានអាយុកាល១៥,០០០ឆ្នាំ។ ហើយក្រុមអ្នកវិទ្យាសាស្ត្រទាំងនោះបានព្រមានថា ការប្រែប្រួលអាកាសធាតុអាចនឹងដោះលែងវីរុសទាំងនោះ ឲ្យចូលមកក្នុងពិភពលោកដ៏ទំនើបមួយនេះ។ ពួកគេបានខួងផ្ទាំងទឹកកកជម្រៅ៥០ម៉ែត្រ ដើម្បីទទួលបានស្នូលទឹកកកចំនួនពីរ។

បន្ទាប់ពីនោះ អ្នកស្រាវជ្រាវបានប្រើបច្ចេកទេសមីក្រូជីវសាស្ត្រ ដើម្បីកំណត់អតិសុខុមប្រាណនៅក្នុងសំណាក។ បច្ចេកទេសទាំងនោះបានបង្ហាញពីវីរុសចំនួន៣៣ក្រុម ក្នុងនោះមានទាំងវីរុសបុរាណចំនួន២៨ ដែលអ្នកវិទ្យាសាស្ត្រមិនធ្លាប់បានរកឃើញពីមុនមក។ នៅក្នុងការចេញផ្សាយដោយក្រុមអ្នកវិទ្យាសាស្ត្របានបង្ហាញថា ការផ្លាស់ប្ដូរអាកាសធាតុឥឡូវនេះ បានធ្វើឲ្យពួកគាត់មានការលំបាកដល់ការធ្វើតារាងទម្រង់ជីវិតដ៏ល្អិតទាំងនោះ ក៏ដូចជាផលលំបាកក្នុងការរក្សាសុវត្ថិភាពពីគ្រោះថ្នាក់។ យ៉ាងហោចណាស់ ការរលាយទឹកកកអាចបណ្ដាលឲ្យបាត់បង់ប័ណ្ណសារដ្ឋានមីក្រុបនិងមេរោគ ដែលអាចធ្វើរោគវិនិច្ឆ័យនិងផ្ដល់ព័ត៌មានអំពីរបបអាកាសធាតុផែនដីកន្លងមក។ ទោះជាយ៉ាងណាក៏ដោយ នៅស្ថានការណ៍អាក្រក់បំផុត ការរលាយទឹកកកនេះអាចដោះលែងធាតុបង្កជំងឺចូលទៅក្នុងបរិស្ថានបាន៕