គុណភាពខ្យល់នៅកម្ពុជាត្បិតថាមានការកើនឡើងនូវកម្រិតជាតិពុលដែលអាចបង្ករឲ្យមានផលប៉ះពាល់ខ្លះដល់សុខភាពពលរដ្ឋ តែវាមិនធ្ងន់ធ្ងរទេបើប្រៀបជាមួយប្រទេសដទៃ។ នេះជាអ្វីដែលអ្នកនាំពាក្យក្រសួងបរិស្ថាន លោកនេត្រ ភក្ត្រាបានបកស្រាយប្រាប់ Khmerloadនាថ្ងៃ១៨មករានេះ។

ការបកស្រាយពីសំណាក់មន្ត្រីក្រសួងយ៉ាងដូច្នេះ ធ្វើឡើងបន្ទាប់ពីមានព័ត៌មានរិះគន់ក្រសួងបរិស្ថានថាធ្វើការយឺតយ៉ាវរឿងផ្សព្វផ្សាយពីកម្រិតជាតិពុលដែលមើលទៅអួរអាប់ពាសពេញក្រុងភ្នំពេញ។ ការរិះគន់ចំៗតាមរយៈបណ្តាញហ្វេសប៊ុកផ្ទាល់ខ្លួនផង និងក្នុងគេហទំព័រផ្លូវការរបស់ក្រសួងផងមានជាហូរហែ ដោយអ្នកទាំងនោះសំអាងថា គុណភាពខ្យល់ធ្លាក់ចុះបែបនេះ អាចបង្កឲ្យមានផលប៉ះពាល់ដល់សុខភាពសាធារណៈ ខណៈអ្នកប្រើប្រាស់បណ្តាញសង្គមជាច្រើនបានបង្ហោះព្រោងព្រាតនូវបញ្ហារួចទៅហើយ ចំណែកឯក្រសួងទើបតែផ្សាយតាមក្រោយ។

ឆ្លើយតបដោយសុទិដ្ឋិនិយម អ្នកនាំពាក្យក្រសួងបរិស្ថានរូបនេះបញ្ជាក់ម្តងហើយម្តងទៀតថា៖ «កម្រិតគុណភាពខ្យល់ធ្លាក់ចុះនេះមិនធ្ងន់ធ្ងរទេ បើប្រៀបជាមួយប្រទេសដទៃ។ ស្ថានភាពនេះមិនទាន់ឈានដល់ការប្រកាសអាសន្ននៅឡើយទេ ហើយវាក៏មិនទាន់ប៉ះពាល់ធ្ងន់ធ្ងរដល់សុខភាពពលរដ្ឋនៅឡើយដែរ។»

លោកនេត្រ ភក្ត្រាបន្តថា៖ «ជាក់ស្តែកបើកម្រិតកំហាប់ជាតិពុលកាន់តែខ្ពស់​ វាអាចបង្កហានិភ័យដល់សុខភាពមែន។ តែចំពោះកម្រិតនៅកម្ពុជាប៉ុណ្ណឹងមិនទាន់បង្កជាស្ថានភាពប្រកាសអាសន្ននៅឡើយ ហើយមែនទែនទៅបញ្ហាកំហាប់គុណភាពខ្យល់ធ្លាក់ចុះនាប្រទេសផ្សេងក្នុងតំបន់ក៏មានការកើនឡើងដូចប្រទេសកម្ពុជាយើងដែរ ក្នុងនោះមានដូចជា ថៃ ឡាវ វៀតណាម ភូមាជាដើមដែលនៅអនុតំបន់ទន្លេមេគង្គ។»

យ៉ាងណាមន្ត្រីបរិស្ថានរូបនេះថា ស្ថានភាពខាងលើ វាអាចបង្កជាផលប៉ះពាល់តិចតួចដែរចំពោះពលរដ្ឋ ដូចនេះពលរដ្ឋគួរពាក់ម៉ាស់ពេលធ្វើដំណើរខាងក្រៅផ្ទះ ព្រមទាំងបរិភោគទឹកឲ្យបានច្រើន។

ចំពោះបញ្ហាបង្កលោកថា វាកើតឡើងមកពីការដុតគល់ជញ្ជាំ្រងរបស់ពលរដ្ឋនៅតាមជនបទ ចំហេះឥន្ធនៈនានាពីយានយន្ត ផ្សែងពីឧស្សាហកម្ម​ និងរោងចក្រ ការដ្ឋានធ្វើផ្លូវ សំណង់​ និងការដឹកដី ព្រមជាមួយនឹងការដុតសម្រាមជាដើម។

គួរបញ្ជាក់ថា ថ្មីៗក្រោយមានការបង្ហោះផ្សាយតាមរយៈបណ្តាញសង្គមជាបន្តបន្ទាប់នូវរឿងខ្យល់មានកម្រិតជាតិពុលនៅក្រុងភ្នំពេញ ក្រសួងបរិស្ថានបានចេញសេចក្តីជូនដំណឹងដោយបញ្ជាក់ថា ស្ថានភាពភាព​គុណភាព​​ខ្យល់មានការធ្លាក់ចុះគួរឲ្យបារម្ភ ជាពិសេសកំហាប់ប៉ារ៉ាម៉ែត្រភាគល្អិត​​និចល PM10 និង PM2.5 មាន​ការ​​កើន​ឡើង​​លើសកំណត់ស្តង់ដារ ដែលជាហានិភ័យបង្កការប៉ះពាល់ចំពោះ​សុខភាព​ប្រជាពល​រដ្ឋ៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ