ថ្មីៗមានសារព័ត៌មានជាច្រើនបានចុះផ្សាយព្រោងព្រាតអំពីរូបថតរបស់អនីតិជន(ជនអាយុក្រោម១៨ឆ្នាំ)មួយក្រុមដែលបានបង្កហឹង្សាទៅលើអនីតិជនដូចគ្នាក្នុងសាលារៀន។ អ្វីដែលគេកត់សម្គាល់ អ្នកសារព័ត៌មានមួយចំនួនបានបិទបាំងមុខជនបង្ក ខណៈគេហទំព័រសារព័ត៌មានមិនតិចទេបានផ្សាយនូវរូបថតរបស់អនីតិជនសង្ស័យទាំងស្រុងដោយគ្មានការបិទបាំង។

ការផ្សាយបែបនោះបានបង្កឲ្យមានការរិះគន់យ៉ាងចាស់ដៃ ដោយអ្នកប្រើប្រាស់បណ្តាញសង្គមមួយចំនួនបានលើកឡើងថា អ្នកសារព័ត៌មានទាំងនោះហាក់គ្មានវិជ្ជាជីវៈទាល់តែសោះ ខណៈមួយចំនួនបានចោទជាសំណួរថា៖ «តើការបង្ហោះរូបថតអនីតិជន មិនថាជនសង្ស័យ ឬជនរងគ្រោះជាសាធារណៈដោយមិនមានការបិទបាំងបែបនេះ អ្នកសារព័ត៌មានខុសឬទេ? ហេតុអ្វី?»

ជាការឆ្លើយតប លោកមេធាវីគង់ សំអុនបានបញ្ជាក់ប្រាប់Khmerloadថា ទង្វើរបស់អ្នកសារព័ត៌មាន ដែលបង្ហោះផ្សាយនូវរូបថតអនីតិជនជាប់ទាក់ទងក្នុងលក្ខខណ្ឌផ្សេងៗជាសាធារណៈបែបនោះ ពិតណាស់វាជាកំហុស។

មេធាវីខាងលើពន្យល់លម្អិតថា៖ «ការបង្ហោះបែបនេះជាកំហុសព្រោះថា ទីមួយ វាបានប៉ះពាល់ដល់សិទ្ធិឯកជន ដោយសារអនីតិជននៅមានអនាគតវែងឆ្ងាយ បើទោះបីគេជាជនបង្កក៏ដោយ។​ ការផ្សាយនោះបានបំពានដល់បុគ្គល អាចប៉ះពាល់ដល់ការរៀនសូត្រ ក៏ដូចជាគ្រួសាររបស់គេផងដែរ។ ដូចនេះហើយ អ្នកបង្ហោះផ្សាយមិនថាអ្នកកាសែត ឬជនណាក៏ដោយត្រូវតែជាអ្នកទទួលខុសត្រូវលើការផ្សាយរបស់ខ្លួន។»

«ទីពីរ តាមច្បាប់ចំពោះអនីតិជន គេមានក្រមសីលធម៌វិជ្ជាជីៈត្រឹមត្រូវ​ ក្នុងនោះមានគោលការណ៍ និងសិទ្ធិជាមូលដ្ឋានរបស់អនីតិជន​ក្នុងន័យការពារអត្តសញ្ញាណជនសង្ស័យ ឬជាប់ពាក់ព័ន្ធ ខណៈមិនទាន់មានការកាត់សេចក្តីណាមួយពីតុលាការ ថាជននោះមានកំហុស ឬអត់នៅឡើយទេ។ ដូច្នេះ ការសន្និដ្ឋានថាខុស ឬត្រូវធ្វើឲ្យអ្នកផ្សាយកាន់តែមានកំហុស ក្នុងលក្ខខណ្ឌខ្លះទង្វើដែលយើងឃើញវាគ្រាន់តែជាជ្រុងមួយប៉ុណ្ណោះ។»

មេធាវីរូបនេះបានបង្ហើបថា ករណីហឹង្សារបស់អនីតិជនខាងលើវាអាជារឿងតូចទេ។ ជារឿងតូចព្រោះថា ជារួមគេអាចដោះស្រាយដោយសន្តិវិធីបានដោយមិនបង្កឲ្យប៉ះពាល់ដោយដល់កិត្តិយសខ្លួនឯង គ្រួសារ​ និងអនាគតដ៏វែងឆ្ងាយរបស់គេឡើយ ប៉ុន្តែបុគ្គលជាអ្នកផ្សាយរូបភាពទៅវិញទេដែលបង្កឲ្យបញ្ហាកាន់តែធំ ធ្វើឲ្យប៉ះពាល់ដល់សិទ្ធិឯកជនរបស់ជនអាយុក្រោម១៨ឆ្នាំ ព្រមទាំងប៉ះពាល់ដល់វិជ្ជាជីវៈរបស់ខ្លួនផងដែរ៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ