ទីបំផុតរកឃើញហើយ! អ្នកឈ្នះកញ្ចប់ដំណើរកម្សាន្ដទៅលេង Paris និង Taipei នៅក្នុងកម្មវិធី «The Dream of Travelling» របស់ក្រុមហ៊ុនអាកាសចរណ៍ EVA Air!

ភ្នំពេញ៖ កាលពីពេលថ្មីៗនេះ ក្រុមហ៊ុនអាកាសចរណ៍ EVA Air បានបង្កើតកម្មវិធីមួយ ដែលមានឈ្មោះ ថា «The Dream of Travelling» សម្រាប់​ផ្ដល់ឱកាសដល់​អ្នកដែលមានក្ដីស្រមៃ ចង់ធ្វើដំណើរ​កម្សាន្ដ​ទៅមើល Eiffel Tower ដ៏ល្បីល្បាញប្រចាំប៉ារីស ឬចង់ទៅ​គយគន់​​ទីក្រុងតៃប៉ិ ពីលើជាន់ទី ៨៩ នៅអគារ​តៃប៉ិ ១០១ បានចូលរួមលេងកម្សាន្ដ និងមាន​ឱកាស​​ឈ្នះ​កញ្ចប់​ធ្វើដំណើរ​កម្សាន្ត​ទៅទី​​ក្រុង​ប៉ារីស ឬតៃ​ប៉ិ ដោយ​ឥតគិតថ្លៃ។ នេះអាចចាត់ទុក​ថាជាឱកាសមួយដ៏កម្រ និងអស្ចារ្យបំផុត ដែល EVA Air បានផ្ដល់​ឱកាស និងបង្កើតនូវ​កម្មវិធីកម្សាន្ដ​សប្បាយៗបែបនេះ សម្រាប់អតិថិជន និងមហាជនទូទៅ។

អ្វីដែលគួរឱ្យភ្ញាក់ផ្អើល កម្មវិធី «The Dream of Travelling» មានបេក្ខជនជាង ៦,០០០ នាក់បាន​ចូលរួម​​ ចុះឈ្មោះ​ចូលរួមលេងកម្សាន្ដ។ បន្ទាប់មកកម្មវិធីបានរៀបចំឈ្មោះបេក្ខជនទាំងនោះយកទៅ​បង្វិល Random (Lucky Draw) ជ្រើសរើសបេក្ខជនចំនួន ៣០ នាក់ មានឱកាសបន្ដ​ទៅចូលរួម​​លេង​ហ្គេមប្រកួត​សប្បាយៗ ដើម្បីឈានទៅដល់ការជ្រើសរើសអ្នកឈ្នះ ០២ រូបចុងក្រោយ មានឱកាសឈ្នះកញ្ចប់​ដំណើរកម្សាន្ដ​នៅទីក្រុង ប៉ារីស និង ទីក្រុងតៃ​ប៉ិ។

ក្នុងព្រឹត្តិការណ៍ប្រកួតផ្ដាច់ព្រ័ត្រ ដើម្បីស្វែងរកអ្នកឈ្នះ ០២ រូបចុងក្រោយនេះ បានប្រារព្ធ​រៀបចំឡើងនៅផ្សារទំនើប AEON Mall សែនសុខ រយៈពេល២ ថ្ងៃ ពោលគឺ ចាប់ពីថ្ងៃទី ១១ ដល់ថ្ងៃទី ១២ ខែមករា ឆ្នាំ ២០២០ វេលាម៉ោង ៩ ព្រឹក រហូតដល់ម៉ោង ៩ យប់។ ក្នុងព្រឹត្តិការណ៍ដ៏ធំនេះ ក៏មាន​ការ​អញ្ជើញ​ចូលរួម​ពីសំណាក់ តារាចម្រៀង Original Song អ្នកនាង អេដា និងតារាហ្វេសប៊ុក​ល្បីឈ្មោះ លោក ហេង វិសាល ដើម្បីចែករំលែក​នូវបទពិសោធន៍ តាមរយៈការហោះហើរជាមួយ EVA Air តាមកៅអីអង្គុយប្រភេទ Business Class ក៏ដូចជាការដំណើរកំសាន្តរបស់ពួកគាត់ទៅទី​​ក្រុង​ប៉ារីស និង​តៃ​ប៉ិផងដែរ។ មិនតែប៉ុណ្ណោះ ចំពោះព្រឹត្តិការណ៍ដ៏ធំមួយនេះ ក៏មានការចូលរួមរបស់ពី​សំណាក់​ភ្នា​ក់ងារ​ក្រុមហ៊ុនទេសចរណ៍របស់ EVA Air ដូចជាក្រុមហ៊ុនទេសចរណ៍ World Pop Travel & Tour ក្រុមហ៊ុន VLK Royal Tourism  ក្រុមហ៊ុន World Express Tours & Travel និង មានស្ដង់លក់​សំបុត្រយន្ដហោះ ដើម្បីទទួលបានការ​បញ្ចុះតម្លៃ​សំបុត្រយន្តហោះដល់ទៅ ១៧ភាគរយ ទៅកាន់​រាល់​គោលដៅរបស់ EVA Air ទាំងអស់​​រួមមាន សហរដ្ឋអាមេរិក អឺរ៉ុប អូស្រ្តាលី និងអាស៊ី ទៀតផង។

យ៉ាងណាមិញ ព្រឹត្តិការណ៍ដ៏ធំមួយនេះដំណើរការទៅយ៉ាងរលូន ក្រោមសំឡេងហ៊ោកញ្ជៀវសប្បាយរីករាយ ពីសំណាក់​​បេក្ខជន​​​​ចូល​​រួមប្រកួតប្រជែង ភ្ញៀវកិត្តិយស និងអតិថិជនរបស់ EVA Air ជាច្រើនដែល​បាន​ចូលរួម។ ជាក់ស្ដែង ឆ្លងកាត់តាមការប្រកួតយ៉ាង​ស្វិតស្វាញ ទីបំផុតកម្មវិធី «The Dream of Travelling» បានរកឃើញ​​បេក្ខជន ០២ រូបចុងក្រោយ ដែលទទួលបានជ័យជម្នះ មានឱកាសធ្វើដំណើរកម្សាន្ដ​ដ៏រីករាយ​ទៅ​​កាន់​ទី​ក្រុងក្នុងក្ដីស្រមៃ​របស់ខ្លួន។ ក្នុងនោះ បេក្ខជនដែលទទួលបានកញ្ចប់ដំណើរកម្សាន្ដ​ទៅកាន់ទី​ក្រុង​ប៉ារីស គឺបានទៅលើ លោក ម៉ៅ សុវិទ្យា និងបេក្ខជនដែលទទួលបានកញ្ចប់ដំណើរកម្សាន្ដទៅកាន់ទីក្រុង តៃ​ប៉ិ បានទៅលើ លោក សេង គ្រុយ។

គួរឱ្យដឹងដែរថា EVA Air គឺជាសមាជិក Star Alliance ហើយជាក្រុមហ៊ុនអាកាសចរណ៍មួយក្នុងចំណោម ក្រុមហ៊ុន​អាកាសចរណ៍ទាំង ១០ ជុំវិញពិភពលោកដែលទទួលបានកម្រិតផ្កាយ៥ SKYTRAX-rated 5-Star ។ អ្នកអានបានបោះឆ្នោតឱ្យ EVA Air ក្លាយជាក្រុមហ៊ុនមួយដែលល្អបំផុតក្នុងការធ្វើដំណើរ និង​លំហែកាយ​ក្នុងចំណោមក្រុមហ៊ុនអាកាសចរណ៍អន្តរជាតិទាំង ១០ ហើយ TripAdvisor បានប្រគល់​ពាន​រង្វាន់​កំពូលៗឱ្យ EVA Air ទៅតាមប្រភេទ ចំនួន៥ ប្រភេទសម្រាប់ពានរង្វាន់ប្រចាំ​ឆ្នាំ ក្នុង​ការ​ជ្រើសរើស​ក្រុមហ៊ុន​អាកាសចរណ៍ដោយអ្នកដំណើរ។

ក្រុមហ៊ុន អាកាសចរណ៍ EVA Air ត្រូវបានបង្កើតឡើងក្នុងឆ្នាំ ១៩៨៩ ក្រុមហ៊ុនអាកាសចរណ៍ អន្តរជាតិឯកជនទីមួយរបស់តៃវ៉ាន់ ដែលជាផ្នែកមួយរបស់ក្រុមហ៊ុន Evergreen Group និងជាផ្នែកមួយរបស់ក្រុមហ៊ុនដឹកទំនិញទូទាំងសកល Evergreen Line។ ក្រុមហ៊ុន​អាកាសចរណ៍ EVA Air ដំណើរការដោយយន្តហោះ Boeing និងAirbus ជាង៨០គ្រឿងទៅ​កាន់គោលដៅ អន្តរជាតិជាង ៦០ គោលដៅទូទាំងទ្វីបអាស៊ី អូសេអានី អឺរ៉ុប និងអាមេរិកខាងជើង ដែលច្រកចេញចូលមាន​ដូចជា ទីក្រុង Paris ទីក្រុង Taipei ទីក្រុង Los Angeles ទីក្រុង New York ទីក្រុង San Francisco ទីក្រុង Seattle ទីក្រុង Brisbane និង ទីក្រុង Vancouver។ អ្នកដំណើរអាចស្វែងយល់បន្ថែមពី EVA កាលវិភាគធ្វើដំណើរ និងការកក់សំបុត្រតាមរយៈ៖ www.evaair.com ៕